भैरहवां विमान मब्वयेकू धकाः येँय् उडान पन

येँ (नेपालभाषा टाइम्स)÷ नेपाल नागरिक उड्डयन प्राधिकरण व नेपाल वायुसेवा निगमया विवादया कारणं म्हिगः नेपालं दिल्ली वनेमाःगु विमान ब्वये मफुत । म्हिगः नेपाल वायुसेवा निगमया जहाज व हिमालय एयर लाइन्सया विमान ब्वयेकेत नागरिक उड्डय प्राधिकरणं पनाबिउगु खः ।

निगुलिं विमान कम्पनीयात गौतमबुद्ध अन्तर्राष्ट्रिय विमानस्थलयं उडान यायेगु तालिका मदयेकूगु धासें प्राधिकरणं उडान कटौती याःगु खः । गौतमबुद्ध अन्तर्राष्ट्रिय विमानस्थलया सञ्चालन खर्च तकं उठे मजुइवं प्राधिकरणं नेपाःया अन्तर्राष्ट्रिय वायुसेवा कम्पनीयात विन्टर सिजनया तालिकाय् भैरहवां उडान यायेमाःगु बाध्यकारी व्यवस्था याःगु खः । तर निगुलिं कम्पनीं भैरहवां विमान ब्वयेकेगु तालिका मदयेकेवं दिल्लीया उडान पना बिउगु खः ।

नेपाल वायुसेवा कम्पनीं म्हिगः चेक–इन काउन्टरय् दिल्ली उडानया नितिं ‘बोर्डिङ पास’ तकं इनेधुंकूगु खःसा गुलिखे यात्रु अध्यागमन व सुरक्षा जाँच पार यानाः दुने थ्यनेधुंकूगु खः । तर आकाझाकां विमानस्थलया छम्ह कर्मचारी काउन्टरय् वयाः छुकिया आधारय् बोर्डिङ पास इनाच्वनागु धकाः न्यनेकने यायेवं छझाः विवाद जूगु खः ।

म्हिगः ब्वयेमाःगु विमानस्थलय् च्वंपिं ७३ म्ह यात्रुतय्सं बोर्डिङ पास कायेधुंकूगु खः । उगु उडानं २५४ म्ह यात्रु दिल्ली ब्वयेमाःगु खः । विमान मब्वइगु जूगुलिं यात्रु व कर्मचारीया दथुइ छझाः वादविवाद नं जूगु खःसा गुलिखे यात्रुं थःपिनिगु विचल्ली जुल धासें निगमप्रति तं प्वंकूगु खः ।

सम्बन्धित बुखँ

LEAVE YOUR COMMENTS