लेकसाइड २४ घण्टा चायेके मबीत रिट
पोखरा – पर्यटकीय शहर पोखराया लेकसाइड २४ सै घण्टा चायेकेगु निंतिं जुयाच्वंगु पहल विरुद्ध मुद्दा लाःगु दु । रेष्टुराँ एण्ड बार एशोसियसनं (रेबानं) लेकसाइडयात २४ सै घण्टा चायेकेगु पहल यानाच्वंगु खःसा थनया होटल संघ धाःसा थुकिया विपक्षय् वनाच्वंगु दु ।
लेकसाइडया स्थानीय आमा समूह, सामुदायिक प्रहरी सेवा केन्द्र लगायत होटल व्यवसायीत सनिलय् ९ बजे लिपा संचालन जुइगु डान्स बार, क्याबिन रेष्टुरा, दोहोरी साँझ, गजल, स्पा, डिस्को क्लब बन्द हे यायेमाःगु माग तयाः अदालतय् वनेवं पोखराय् थ्व विषयय् तःधंगु चर्चा जुयाच्वंगु दु ।
पश्चिमाञ्चल होटल संघ –हान)या अध्यक्ष विकल तुलाचन, पुलांम्ह अध्यक्ष गोविन्दराज पहारी लिसें ४२ म्हेसिनं स्थानीय बासिन्दा व पर्यटकयात समेत लकेसाइडय् च्वनेत असहज जूगु धासें थज्याःगु व्यवसाय तुरुन्त बन्द याकेत अन्तरिम आदेश माग यासें रिट दायर यायेवं व्यवसायीतय् दथुइ हे वैचारिक द्वन्द्व सुरु जूगु खः ।
बहनी ९ बजे निसें सुथय् ४ बजे तक हे रेष्टुराँ, डान्स क्लबय् होहल्ला जुइगु कारणं स्थानीय बासिन्दा व होटलय् वइपिं पाहाँपिंत प्रत्यक्ष लिच्वः लानाच्वंगुलिं तत्काल थज्याःगु व्यवसाय बन्द यायेमाःगु माग रिटय् यानातःगु दु ।हानया अध्यक्ष तुलाचनं पर्यटन व्यवसाययात व्यवस्थित यायेत प्रशासनयात दबाब बीगु निंतिं थःपिं लगे जुयाच्वनागु खँ धयादिल ।
थ्व विषयय् निर्देशिका दयेकाः पर्यटन व्यवसाययात व्यवस्थित यायेमाःगु पक्षय् थःपिं दुगु वय्कःया धापू दु ।रेबान पोखराया अध्यक्ष भीमसेन भुजेलं आर्थिक समृद्धिया आधार पर्यटन धकाः धयाच्वंगु इलय् थुकियात व्यवस्थित यानाः न्ह्याः वनेगु विकल्प मदु धयादीगु दु ।
अर्बौं लगानी दुगु क्षेत्रयात चिकिचाधंगु चाकः दुने तयाः पंगः थने मजिउगु व समस्या न्यूनिकरणय् सरकार, व्यवसायी व स्थानीय च्वनाः सहलह याःसा बांलाइगु रेबानया धापू दुगु खँ वय्कलं धयादिल ।
रिट निवेदनय् चान्हय् चले जुइगु जेनेरेटर, डान्सबारं पिहां वइगु तच्वःगु सः, रंगीविरङ्गी मतं जनजीवनयात हे लिच्वः लाकाच्वंगु व चान्हय् रेष्टुरां पिहां वइपिं ग्राहकतय्सं अश्लिल व्यवहार याइगुलिं नकारात्मक लिच्वः लानाच्वंगु दावी नं यानातःगु दु । तच्वःगु सः व झिलिमिलि मतं वातावरणीय प्रदूषण अप्वःगु व फेवाताल व सीमसारया जीवजन्तुयात तकं लिच्वः लानाच्वंगु खँ नं न्ह्यथनातःगु दु ।
होटल व्यवसायी व स्थानीयं तःगु रिटय् उच्च अदालतं पोखरां विपक्षीया नामय् कारण देखाउ आदेश जारी यायेधुंकूगु दु । मुख्य न्यायाधीश यज्ञप्रसाद बस्यालया इजलासं बिहिवाः विपक्षीया नामय् कारण देखाउ आदेश जारी यासें अन्तरिम आदेश जारी यायेमाःगु कि म्वाःगु धयागु बारे सहलह यायेत निगुलिं पक्षयात साउन २० गते सःतूगु दु ।
LEAVE YOUR COMMENTS