वा उत्पादन अप्वल, जाकिया आयात कुहां वन
येँ (रासस)- थगुनेया तुलनाय् वाया उत्पादन अप्वःसां देय्या राष्ट्रिय आवश्यकता धाने यायेत अझं थ्यंमथ्यं प्यंगू लाख ८० हजार मेट्रिक टन जाकी म्हो जुइगु खनेदुगु दु । नेपालय् जाकिया राष्ट्रिय आवश्यकता थ्यंमथ्यं ४० लाख मेट्रिक टन दुगुलिं ३५ लाख २० हजार मेट्रिक टन आन्तरिक उत्पादनपाखें हे वइगु अनुमान दु ।
लिपांगु इलय् वाया समग्र राष्ट्रिय उत्पादन अप्वःगु व जाकिया आयात म्हो जूगु अवस्थाय् नंथ्व ल्याखं जाकि म्हो जुइगु खनेदुगु खँ कृषि तथा पशुपंछी विकास मन्त्रालयं धाःगु दु ।
नेपालय् जाकिया उपभोग छम्ह मनुखं दँय् १२१ केजी याइगु खनेदु । थ्व ल्याखं स्वय्बलय् जाकिया आवश्यकता करिब ४० लाख मेट्रिक टन जूवइ ।
न्ह्यःया आर्थिक दँया तुलनाय् आर्थिक दँ २०७८÷७९य् वा÷जाकि÷ च्वकिया आयात धाःसा थ्यंमथ्यं प्यंगू अर्ब अर्थात ६.३ प्रतिशतं म्हो जूगु खः । आर्थिक दँ २०७८÷७९ या न्याला अर्थात मंसिर तकया तुलनाय् ३८.२ प्रतिशतं म्हो जूगु तथ्यांकं खनेदुगु दु । अथेहे मन्त्रालयया तथ्यांक कथं देशय् चैत व वर्षे यानाः १४ लाख ४७ हजार, ७८९ हेक्टर क्षेत्रफलय् वा पीगु यानाच्वंगु दु । वा नेपाःया मू खाद्यान्न बाली खः ।
थौंकन्हय् वाया समग्र राष्ट्रिय उत्पादन ५४ लाख ८६ हजार ४७२ मेट्रिक टन व उत्पादकत्व ३.७९ मेट्रिक टन प्रतिहेक्टर दयाच्वंगु मन्त्रालयया प्रारम्भिक अनुमान दु । वंग आर्थिक दँ २०७८÷७९या तुलनाय् थुगु आर्थिक दँय् वाया समग्र क्षेत्रफल निगू प्रतिशतं म्हो खनेदुगु दुसा उत्पादनय् धाःसा ६.९४ प्रतिशतं बृद्धि जूगु दु ।
समग्र नेपाःया प्रदेशगत व जिल्लागत चैते वा व वर्षे सिजनया वाया क्षेत्रफल, उत्पादन व उत्पादकत्वया सार्वजनिक याःगु विवरणय् थ्व तथ्यांक न्ह्यथनातःगु खः । नेपालय् वाया तसकं लोकंह्वाःगु जात हर्दिनाथ, खुमल, राधा, स्वर्ण सव खः । वाय् आत्मनिर्भरताया निंतिं सरकारं स्थानीय तह व प्रदेशया समन्वयय् मन्त्रालयय् उत्पादन प्रवद्र्धनया थीथी ज्याझ्वः न्ह्याका वयाच्वंगु दु ।
मसिनु व वास वःगु, चैत व जातीय वा विकास अनुसन्धान कार्यक्रम तथा न्यूनतम समर्थन मू क्वःछिनाः न्यायेगु व्यवस्थायात प्रभावकारी रुपं न्ह्याकागु खँ नं मन्त्रालयं धाःगु दु । प्रधानमन्त्री कृषि आधुनिक परियोजनापाखें सहकारी मार्फत क्वःछिनातःगु न्यूनतम भावं वा न्यायेगु व्यवस्था यानातःगु दु । सरकारं थुकिया वापत सहकारीयात प्रतिक्विन्टर ११२ तका व्यवस्थापन खर्च बिइगु याना वयाच्वंगु दु । आःतक सुचीकृत सहकारी पाखें करिब ९० हजार मेट्रिक टन वा न्यायेगु निंतिं आशय वयेधुंकूगु जानकारी नं बिउगु दु ।
प्रदेशगत रुपं वंगु आर्थिक दँया तुलनाय् थुगुसी दकलय् अप्वः सुदूर पश्चिम प्रदेशय् करिब ३३.३३ प्रतिशतं वा उत्पादन अप्वःगु तथ्यांकं क्यंगु दु । थगुने बेमौसमी वा वयाः सुदूरपश्चिम प्रदेशया कैलाली व कञ्चनपुर जिल्लाय् तःधंगु क्षति जूगु खः । थुगुसी लुम्बिनी प्रदेशय् १५.२ प्रतिशत, प्रदेश १ य् ५.७२ प्रतिशत व कर्णाली प्रदेशय् ३.४६ प्रतिशत, मधेस प्रदेशय् ०.१८ प्रतिशत उत्पादन अप्वःगु दुसा बागमति व गण्डकी प्रदेशय् थगुनेया तुलनाय् थुगुसी छसिकथं १.४५ व ३.७४ प्रतिशत उत्पादन म्हो जूगु दु ।
तराइया जिल्लाय् रासायनिक सा चूलाःगु, उन्नत पुसा छ्यलाबुला अप्वया वःगु व स्थानीय तहतक कृषि प्रविधिया पहुँचया कारणं वा उत्पादनय् थुगुसी सामान्य वृद्धि खनेदुगु मन्त्रालयया धापु दु ।
LEAVE YOUR COMMENTS