लाभा, प्याज व खाया ला थिके याःपिंत कारवाहीया माग

येँ – राष्ट्रिय उपभोक्ता मञ्चं अनियमित रुपं प्याज, लाभा, खाया लाय् बजाः भाः थकापिंत कारवाहीया माग यासें उद्योग, वाणिज्य तथा आपूर्ति मन्त्रालयय् निवेदन बिउगु दु । मञ्च खाया ला थिके यायेगु निंतिं व्यवसायीतय्सं अनियमित रुपं ३० लाख चल्ला स्याःगु व छगू करोडं मल्याक ख्येँ डोजरं तछ्याःगु खँ धासें थुकिं यानाः आः बजारय् खाया ला किलोया ४२० तका व ख्येँ छगःया १८ तका थ्यंगु खँ धाःगु दु । लछि न्ह्यव तक किलोया २४० तकां बियाच्वंगु खाया लायात चल्ला स्यायेधुंकाः लाया अभाव थें खनेदयेकाः शतप्रतिशत धयाथें भाः थिके यानाः मियाच्वंगु दु ।

व्यवसायीतय्सं खाया लाया भाः प्यसलं मल्याक कायेधुंकूसां किसानतय्सं धाःसा किलोया निसः तका हे काये मखंगु धासें मञ्चं व्यवसायीतय्सं सिइके चायेकं हे ला हे अभाव याःगु धयागु हाकुबजाः यायेत जक जूगु खँ धाःगु दु ।

अथेहे थौंकन्हय् बजारय् छुं हे समस्या मदयेक भारतं प्याज आयात जुया च्वंगु व चीनं नं न्हि १०० मेट्रिक टन स्वयां अप्वः प्याज दुहां वयाच्वंसां प्याज नं किलोया १४० तका कयाः हाकु बजा यानाच्वंगु खँ मञ्चं धाःगु दु ।
मोहनिबलय् तक किलोया ४५ तकां लाःगु प्याज किलोया २४० तका थ्यंक कायेगु धयाःगु हाकु बजाः हे जूगु धासें प्याजया थोक, खुद्रा व्यापारी सकसितं कारवाही यायेमाःगु खँ मञ्चं निवेदनय् न्ह्यथनातःगु दु ।

अथेहे कोरोना भाइरसं यानाः चिनियाँ लाभा दुहां मवःगु धासें लाभा किलोया हे ७५० तका थ्यनेधुंकूगु दु । लछि न्ह्यव तक किलोया १३० तका थ्यना च्वंगु लाभा आः किलोया ७५० तका थ्यनेगु धयाःगु थःथवय् हे अजूचायापुगु खँ धासें आः बजारय् लाभाया अभाव मदुगु व स्थानीय उत्पादनं हे ६० प्रतिशत धाने यायेफुगु अवस्थाय् नं लाभाया भाः थिकेयाःपिंत नं हदै तक कारवाही यायेमाःगु खँ मञ्चं धाःगु दु ।

अध्यक्ष प्रेमलाल महर्जनं हस्ताक्षर यानाः ब्यूगु निवेदनय् उपभोक्ता संरक्षण ऐन २०७५ व मेमेगु प्रचलित ऐन कानुन कथं बजाःया अनुगमन यानाः दोषीतय्त कारवाही यानाः बजाःयात व्यवस्थित यानाः उपभोक्तायात राहत बीमाःगु खँ धयातःगु दु ।

सम्बन्धित बुखँ

LEAVE YOUR COMMENTS