छु जुइ थें प्रदेश ३ या चलखेल ?

येँ – ३ नम्बर प्रदेशया मुख्यमन्त्री डोरमणि पौडेलं बांलाक ज्या मयाः धासें वय्कःयात चीकेत दुनें दुनें न्ह्यानाच्वंगु अभियान सफल मजुइगु खँ धाःगु दु । मुख्यमन्त्री पौडेलयात चीकाः अष्टलक्ष्मी शाक्ययात न्हूम्ह मुख्यमन्त्री दयेकेमाः धकाः पुलांम्ह मन्त्री केशव स्थापित लगे जुयाच्वंगु खःसां नं वय्कःयात आपालं नेवाः सांसदतय्सं हे विश्वास मयाःगु खँ नां कने चाहे मजूगु छम्ह सांसदं ‘नेपालभाषा टाइम्स’ यात कनादीगु दु ।

न्हापा अष्टलक्ष्मी शाक्ययात मुख्यमन्त्री दयेकेमाः धकाः लबिङ यानाच्वंगु इलय् स्थापितं पौडेलयात ग्वाहालि याःगु कारणं आः स्थापितयात नेवाः सांसदतय्सं पत्याः मयाःगु खँ वय्कलं कनादिल ।अथे हे मेम्ह छम्ह नेवाः सांसदं स्थापितपाखें न्हापा गल्ति जुइधुंकूगुलिं आः वय्कःयात विश्वास यायेगु अवस्था मदुगु खँ कनादिल ।

वय्कलं धयादिल, ‘फुटबल कासाय् सुं नं खेलाडीं स्वक्वः तक गल्ति यात धाःसा वयात कासां हे आउट याइ थें राजनीतिइ नं छक्वः गल्ती यात धाःसा लिपा म्हितेगु अवसर दइ मखु ।’वय्कःपिं निम्ह सांसदतय्सं स्थापितं न्ह्याकाच्वंगु अभियान सार्थक जुइ फइ मखु धासें स्थापितयाके दुगु राजनीतिक अस्थिरतां यानाः वय्कःयात विश्वास याये मफइगु खँ नं कनादीगु दु ।

मेखे सांसद स्थापितं धाःसा मुख्यमन्त्री पौडेलयात चीकेगु लागिं संसद दुने खेल शुरु जुइधुंकूगु खँ कनेगु यानाच्वंगु दु । पौडेलयात चीकेगु लागिं थम्हं प्रधानमन्त्री केपी ओलीयात समेत नापलायेधुनागु व प्र्रधानमन्त्रीं नं थःत हे समर्थन याःगु दावी नं यानादीगु दु ।