भाषा, कला, संस्कृतिया निंतिं विस्तृत योजना दयेकाः वने –
लक्ष्मण गमाल
येँ मपा १६ वडाअध्यक्ष उम्मेदवार, नेकपा (एस)
छिगु मुख्य एजेन्डा छु ?
येँ महानगरपालिका १६ वडावासीयात सरल, सहज व व्यवस्थित रुपं सेवा बीगु नापं वडाया आवश्यकताकथं दिगो व तीव्र विकास यायेगु मुख्य एजेन्डा ज्वना वयाच्वनागु दु । नापं सेवाग्राहीयात बीगु सेवाय् जुयाच्वंगु ढिलासुस्ती, अनियमितता व व्यक्तिवादी हावी जुयाच्वंगु प्रवृत्तिया अन्त्य यायेगु व विकृति, विसंगतिया नं अन्त्य यानाः प्रणालीगत विकास, सुशासन व पारदर्शीता कयाम यायेगु खः ।
वडाया मुख्य समस्या छु खंकादिया ?
नियमित रुपं जुइमाःगु ज्याय् ढिलासुस्ती, अपारदर्शी, आर्थिक चलखेल, बिचौलिया हावी जुयाच्वंगु दुसा जनप्रतिनिधित नं मतदाताप्रति उत्तरदायी जुयाच्वंगु मदु । अधिकार व कर्तव्यप्रति सचेत मजुइगु नापं विष्णुमती खुसिया सौन्दर्यीकरण याये मफुगु, थौंया आधुनिक इलय् नं डिजिटल प्रविधियात अंगीकार याये मफुगु मू समस्या खः ।
छि निर्वाचित जुयादी धइगु आधार छु दु ?
दकलय् तःधंगु आधार धइगु ला थनया मतदाता हे जुल । उकिया नापनापं नेपाल कम्युनिष्ट पार्टी (एकीकृत समाजवादी)या बल्लाःगु सांगठनिक अवस्था, नेकपा (माओवादी केन्द्र) नापया सहकार्य व वडा दुनेया आपालं सामाजिक संघसंस्थां बियाच्वंगु समर्थन अले वडावासीया सुवाः हे निर्वाचित जुइगु आधार खः ।
त्याना वयेधुंकाः दकलय् न्हापां छु यानादी ?
दकलय् न्हापां वडाय् जुयाच्वंगु भ्रष्टाचार व अनियमिमतता अन्त्य यायेगु जुइ । उकिया निंतिं जिपिं दृढ संकल्पित दु । अनंलि आधारभूत आवश्यकताया लिधंसाय् प्राथमिकता बियाः फक्व याकनं योजना कार्यान्वयन यायेगु जुइ । ज्येष्ठ नागरिक, मस्त व मिसातय् स्वास्थ्य संवेदनशीलतायात ध्यानय् तयाः फक्व निःशुल्क व मखुसा न्यून शुल्कय् वासः याके । वडा ज्याकू व कर्मचारीयात जनमैत्री दयेकाः डिजिटल प्रविधिपाखें सेवा उपलब्ध याकेगु निंतिं कुतः याये । विज्ञतय् सल्लाह, सुझावकथं नमूना वडाया रुपय् विकास यायेगु नापं सुशासन कायम याये ।
भाषा, कला, संस्कृतिया उत्थानया निंतिं छु योजना दु ?
भाषालिसें झीगु थःगु हे बिस्कं म्हसीका दुगु मौलिक कला, संस्कृति, परम्परा म्वाका तयेत छगू विस्तृत योजना दयेकाः न्ह्याः वनेगु जुइ । जिगु हे नेतृत्वय् सो¥खुट्टेया ऐतिहासिक ल्वहंहिति, पकनाः गणेद्यःया मूलुखा दयेकाः मौलिकताया संरक्षण यायेगु ज्या जूगु दु । मेमेगु नं आपालं ज्या यानागु दु । आः निर्वाचित जुइधुंकाः नं जि व जिगु पुचलं थुपिं खँयात नं ध्यानय् तयाः प्राथमिकता बिया वनेगु जुइ । थनया मूर्त अमूर्त सम्पदाया संरक्षणलिसें मांभाय् नेपालभाषाया जगेर्ना व प्रवद्र्धनया निंतिं योजनाबद्ध रुपं हे न्ह्याः वनेगु जुइ ।
LEAVE YOUR COMMENTS