
ख्वप(नेपालभाषा टाइम्स)- नेवाः सांस्कृतिक संरक्षित क्षेत्र व थाय्बाय्या मौलिक नांयात कयाः छगू अभिमुखीकरण ज्याझ्वः जूगु दु । नेवाः देय् दबू ख्वप जिल्ला समिति व ख्वप नगर कमिटीया मंकाः ग्वसालय् उगु ज्याझ्वः जूगु खः ।
देय् दबू ख्वप जिल्लाया नायः नरेश नेवाःया सभापतित्वय् जूगु ज्याझ्वलय् मूपाहांकथं नेवाः जागरण मञ्चया नायः ओमचरण अमात्य झायादीगु खः । ज्याझ्वलय् नवासें वय्कलं नेवाःया पहिचानया मू पक्ष जुयाच्वंगु नेपालभाषायात म्वाका तयेमाःगु खँय् बः बियादिल । भाषा नीति बहुभाषी जुइमाः धासें छेँ छेँय् नेपालभाषां खँ ल्हाकेत उकथंया वातावरण तयार यायेमाःगु खँय् नं बः बियादिल ।
देय् दबू ख्वप नगर समितिया सल्लाहकार कृष्ण प्रजापतिं वंगु असार ८, ९ व १० गते धौख्यलय् स्वन्हुयंकं जूगु प्रशिक्षक प्रशिक्षण तालिमपाखें सयेकागु खँ न्ह्यःने यंकेगु ल्याखं स्वनिगःया झिगू लागाय् थुकथंया ज्याझ्वः न्ह्यानाच्वंगु जानकारी बियादिल ।
देय् दबूया केन्द्रीय न्वकु रश्मिला प्रजापति, स्वनिगः विशेष प्रदेशया नायः श्रीकृष्ण महर्जनं आदिवासी जनजातिया अधिकार, नेवाः सांस्कृतिक संरक्षित क्षेत्रया विषयय् अभिमुखीकरण तालिम बियादीगु खः ।
नेवाः मिसा दबू ख्वपया ग्वाहालिं जूगु ज्याझ्वलय् देय् दबू ख्वपया सल्लाहकार प्रजापतिं मौलिक नांया विषयय् जानकारी बियादीगु खः । अभिमुखीकरणय् स्वम्हेसिया सहभागिता दुगुु खः ।
LEAVE YOUR COMMENTS