ने. सं. ११४४ कौलाथ्व सप्तमी - फूलपाती

कोलोराडोय् कुमारिया खः सालाः येँयाः

येँ(नेपालभाषा टाइम्स)-अमेरिकाया कोलोराडोय् न्हापांखुसी कुमारिया खः सालाः यँयाः नखः तःजिक हंगु दु । नेवाः समुदायया ख्वातुगु बसोबस दयाच्वंगु कोलोराडोय् नेवाः धर्म, कला, संस्कृति संरक्षणलिसें म्हसीका बीगु ल्याखं यँयाः नखः हंगु खः ।

कोलोराडो नेवाः खलःया ग्वसालय् नेपाली साँस्कृतिक केन्द्र नेपाली घरं कुमारिया खः साःगु खः । कुमारिया खः साले न्ह्यः गणेश, भैरव व कुमारिया विधिपूर्वक पुजा याःगु खः । वयां लिपा कुमारि खः साःगु खःसा नापं पुलुकिसि, लाखेप्याखं नं पिथंगु खः । कोलोराडो सहरय् सलंसःया ल्याखय् दुपिं नेवाःलिसें गैर नेवाःतय्सं ब्वति काःगु ज्याझ्वलय् जीवित देवदेवीकथं कयातःपिं स्वम्हं द्यःपिंत लसकुस ध्वाखां धिमेबाजं थानाः लसकुस यानाः दबुलिइ यंकूगु खः ।

नेपाःया राष्ट्रिय म्येँ व नेवाः राष्ट्रिय म्येँ हायेकाः न्ह्याःगु ज्याझ्वलय् खलःया नायः भूषणलाल श्रेष्ठं लसकुस यानादीगु खः । उगु इलय् कुमारिया खः दयेकेत मदिक्क ग्वाहालि यानादीपिं वरिष्ठ कलाकार हिरण्य भोजपुरे, समाजसेवी नारायण श्रेष्ठ व खलःया संस्थापक नायः प्रेमकाजी श्रेष्ठयात हनापौ देछासे हनेज्या याःगु खः । स्थानीय ईकथं न्हिनसिया १२ ताःनिसें सनिलाय ४ ताः ईतक न्ह्याःगु यँयाःया ज्याझ्वलय् ब्वति कयादीपिं सकसितं प्रसादकथं समय्बजि इना बिउगु खः ।

खस नेपाली संकिपा ख्यःया नांजाःपिं वरिष्ठ कलाकार कृष्ण मल्ल व शर्मिला मल्लया विशेष उपस्थिति दुुगु ज्याझ्वलय् कोलोराडो सहरय् च्वंगु थीथी नेपाली संघसंस्थाया पदाधिकारी, बुद्धिजीवि, समाजसेवी, व्यवसायी, कलाकार, पत्रकार लगायतया आपालं ब्यक्तिपिनिगु उपस्थिति दुगु खः ।

ज्याझ्वलय् आपालं धइथें नेवाः दाजुकिजा तःकेहेंपिं परम्परागत नेवाः वसतय् सहभागि जूगु खः ।