कृषिइ त्यासाय् बैंकतय् बेवास्ता

येँ – नेपाल राष्ट्र बैंकं कृषिइ अनिवार्य १० प्रतिशत लगानी थ्यंकेमाःगु निर्देशन बियातःसां नेपाःया फुक्क धयाथें वाणिज्य बैंकतय्सं बेवास्ता यानाच्वंगु दु । नेपाल राष्ट्र बैंकं नकतिनि पितबिउगु मौद्रिक नीतिइ नं नेपाःया वाणिज्य बैंकतय्सं कृषि वंगु आवया जेठ मसान्त तक मुक्कं ८.६ प्रतिशत जक त्यासा लगानी याःगु उल्लेख यानातःगु दु ।

साना किसान राष्ट्रिय महासंघया पुलांम्ह अध्यक्ष उद्धव अधिकारीं कृषि क्षेत्रय् ल्याय्म्हतय् आकर्षण अप्वया वनाच्वंसां वाणिज्य बैंकतय्सं कृषि क्षेत्रय् लगानी यायेत त्वह तयाच्वनीगु व प्रक्रिया झन्झट यानाः लिबाकाच्वनीगु खँ धयादिल । राष्ट्र बैंकं वंगु श्रावण ८ गते मौद्रिक नीति सार्वजनिक याःगु खः ।

थुगु मौद्रिक नीतिइ नं राष्ट्र बैंकं वाणिज्य बैंकतय् कूल पुँजीया १० प्रतिशत लगानी कृषि क्षेत्रय् अनिवार्य यायेमाःगु व्यवस्था यानातःगु दु । नेपाल राष्ट्र बैंक एने २०५८ य् दुगु व्यवस्था कथं आथिृक दँ २०५९–६० निसें राष्ट्र बैंकं वार्षिक मौद्रिक नीति सार्वजनिक यायेगु याना वयाच्वंगु दु । मौद्रिक नीतिं सहुलियतपूर्ण कृषि कर्जा काइपिं ऋणीतय् ल्याः धाःसा न्ह्यथनेबहः कथं अप्वया वनाच्वंगु खँ धाःगु दु ।

असार मसान्त तक थज्याःगु त्यासा काइपिं किसानतय् ल्याः १५ हजार ९१६ म्ह दुगु खःसा उमिसं २९ अर्ब ३६ करोड त्यासा कयातःगु दु ।
नेपाल सरकारं कृषि कर्जाय् ५ प्रतिशत ब्याज अनुदान बीगु व्यवस्था यानातःगु दु । थ्व वर्ष सहुलियतपूर्ण कर्जाया निंतिं सरकारं मुक्कं छगू अर्ब २५ करोड ब्याज अनुदान बिउगु दु ।

कृषि, पशुपालन व मत्स्य पालनया निंतिं किसानतय्सं वाणिज्य बैंकतय्सं १० प्रतिशत स्वयां अप्वः ब्याज कायेमदुगु मौद्रिक नीतिइ न्ह्यथनातःगु दु ।

कृषि उद्यम तथा व्यवसाय कर्जा प्रवाह यायेबलय् १५ लाख तका तकया त्यासाय् बैंक व वित्तीय संस्थातय्सं आधार दरय् थप निगू प्रतिशत जक तकया ब्याज तोके यायेमाःगु, छुं नं कथंया सेवा शुल्क कायेमदइगु व ई स्वयां न्ह्यव हे त्यासा भुक्तानी यात धाःसा अग्रिम भुक्तानी शुल्क काये मदइगु व्यवस्था मौद्रिक नीतिइ यानातःगु दु ।

अथेहे बैंक तथा वित्तीय संस्थाया हरेक शाखां थज्याःगु त्यासा निवेदन वःगु न्हय्न्हु दुने स्वीकृत यायेमाःगु व स्वीकृत मजुइगु खःसा ग्राहकतय्त स्पष्ट जानकारी बीमाःगु व्यवस्था यानातःगु दु ।

सम्बन्धित बुखँ

LEAVE YOUR COMMENTS