सुनसरी व मोरङय् सछि स्वयां अप्वः उद्योग बन्द

येँ – सुनसरी व मोरङय् सछि स्वयां अप्वः उद्योग बन्द जूगु दु । उद्योग बन्द जुयाः ३० हजार श्रमिकया रोजगारी गुमे जूगु दु । प्रमुख औद्योगिक शहर विराटनगर, दुहबी व खनारय् सञ्चालन जुयाच्वंगु उद्योग सरकारी बेवास्ताया कारणं धरासायी जूगु उद्योगीतय्सं धाःगु दु । सुनसरी–मोरङ औद्योगिक करिडोर जःखः ६६५ गू उद्योग सञ्चालन जुया वयाच्वंगु खः सा १०७ गू उद्योग बन्द जूगु खः ।

बन्द जूगु उद्योगय् २३ अर्ब स्वयां अप्वः लगानी जुयाच्वंगु खः । देशय् राजनीतिक अवस्था सवल जूसां नं उद्योग धन्दा ब्वलने मफुगु खँ व्यवसायीपिंसं धायेगु यानाच्वंगु दु । सरकारया आर्थिक नीतिया कारणं उद्योगधन्दा बन्द यायेमाःगु अवस्था वःगु खँ व्यवसायीपिंसं धाःगु दु । व्यवसायीतय् कथं उद्योगया संरक्षण मजूगु व संघीयताया नामय् थीथी कथंया करया कारण व्यवसायी मारय् लानाच्वंगु दु ।

मेखे उद्योग क्षेत्रय् दुगु जग्गाया भाः थहां वंगुलिं यानाः नं उद्योग बन्द यायेमाःगु अवस्था वःगु खँ धाःगु दु । जग्गा भाः थहां वंगुलिं उद्योगीतय्सं जग्गा न्यानाः लगानी यायेमफइगु जूगुलिं सरकारयात औद्योगिक क्षेत्र स्थापना यायेत माग याना वयाच्वंगु खःसां नं सरकारं उद्योगी व्यवसायीया मागयात वेवास्ता याना वयाच्वंगु द्वपं उद्योगीतय्सं बिउगु दु ।

सरकारं विशेष आर्थिक क्षेत्र स्थापना याःसा जग्गा न्यायेगु ध्यबा उद्योगय् लगानी जुइगु उद्योगीतय् धापू दु । उद्योगीतय्सं सरकारया स्वामित्वय् दुगु सुनसरीया अमरडुवास्थित ६५० बिघा जग्गाय् औद्योगिक क्षेत्र दयेकेमाःगु माग यानावयाच्वंगु दु ।

 

सम्बन्धित बुखँ

LEAVE YOUR COMMENTS