प्रतिनिधि सभा व प्रदेश सभाया दुजःपिंत काठमाडौं सुनचाँदी व्यवसायी संघया हना

येँ (नेपालभाषा टाइम्स)- काठमाडौं सुनचाँदी व्यवसायी संघं येँया थीथी निर्वाचन क्षेत्रं निर्वाचित जुया वःपिं प्रतिनिधि सभा व प्रदेश सभाया दुजःपिंत हनेज्यायासें भिंतुना देछाःगु दु । संघया अध्यक्ष सुरेश शाक्यया सभापतित्वय् बिहिवाः छगू ज्याझ्वःया दथुइ प्रतिनिधि सभा सदस्यपिं येँ क्षेत्र नं. १ प्रकाशमान श्रेष्ठ, क्षेत्र नं. ७ या गोपाल पराजुली, क्षेत्र नं. ८ या विराजभक्त श्रेष्ठ व क्षेत्र नं. ९ या कृष्णगोपाल श्रेष्ठयात ख्येँ सगं बियाः भिंतुना देछाःगु खः ।

अथेहे प्रदेश सभा पाखें येँ क्षेत्र १. (क) या दिपेन्द्र श्रेष्ठ, क्षेत्र नं. ६ (ख)या हरिप्रभा खड्गी, क्षेत्र नं. ७ (क)या बसन्त मानन्धर, (ख)या प्रकाश श्रेष्ठ, क्षेत्र नं. ८ (क)या शैलेन्द्र वज्राचार्य व क्षेत्र नं. ९ (क)या नुरज वज्राचार्यपिंत नं ख्येँ सगं बियाः हंगु खः ।

ज्याझ्वलय् सकलें प्रतिनिधिपिनि पाखें न्ववासें प्रतिनिधि सभा सांसद प्रकाशमान श्रेष्ठं लुँवहः व्यवसायीपिंसं तःदँ न्ह्यव निसें ल्ह्वना वयाच्वंगु लुँवह सम्बन्धी ऐन हयेगु निंतिं व्यवसायीपिं लिसे सहलह यानाः माःगु भूमिका म्हितेगु खँ धयादीगु खः । ज्याझ्वलय् सभापति शाक्यं निर्वाचनय् त्यानावःपिं सकलसित कार्यकाल सफल जुइमाः धासें भिंतुना देछायादीगु खः ।