मरिससलिसेया श्रम समझदारीइ छु छु दु

यँे – नेपाः व अफ्रिकी देय् मरिसस दथुइ मंगलवाः श्रम समझदारीपत्रय् हस्ताक्षर जूगु दु । श्रम, रोजगार तथा सामाजिक सुरक्षामन्त्री गोकर्ण विष्ट व मरिससया श्रम, औद्योगिक सम्बन्ध, रोजगार तथा तालिममन्त्री सुदेश एस क्यालिचर्न दथुइ स्वीट्जरल्यान्डया जेनेभाय् समझदारी पत्रय् हस्ताक्षर जूगु खः ।

थ्व समझदारी लिपा होटल, अतिथि सत्कार व उत्पादन क्षेत्रय् तःधंगु ल्याखय् नेपाःमि ज्यामितय्त मरिसस छ्वयेफइगु सम्भावना दुगु खँ धाःगु दु । अफ्रिकी देय् मरिसस पर्यटनया निंतिं तसकं लोकंह्वाःगु देय् खः ।थ्व सम्झौताय् नेपाःमि ज्यामि मरिसस वनेबलय् ज्यामि छनोट व भर्नाया निंतिं लगे जुइगु फुक्कं ध्यबा रोजगारदातां हे ब्यहोरे यायेमाःगु खँ न्ह्यथनातःगु दु ।

अथेहे यदि रोजगारदाता कम्पनीया कमजोरीया कारणं प्रतिष्ठान बन्द जुयाः बेरोजगार जुइगु अवस्था वल धाःसा ज्यामितय्सं वैकल्पिक रोजगारी माले दइगु खँ नं न्ह्यथनातःगु दु । सम्झौता कथं मरिससय् ज्या याःवंपिं नेपाःमितय्त बीगु पारिश्रमिक नं म्होतिं नं मरिससया नागरिकतय्त बीगु न्यूनतम ज्याला बराबर जुइ ।

अथेहे मिसापिं ज्यामितय् निंतिं श्रमिक कल्याण व सुरक्षाया विशेष उपाय सुनिश्चित जुइ । मरिससय् ज्या यानाः कमे जूगु ध्यबा नेपाःमितय्सं विना रोकतोक नेपाः छ्वयेदइ । ज्या याना च्वंच्वं ज्यामिया मृत्यु जुल धाःसा वया सीम्ह नेपाः छ्वया हयेगु व वया छेँजःपिनि सहमतिइ मरिससय् हे अन्त्येष्टी यायेगु जूसां रोजगारदाता कम्पनीं हे फुक्कं ध्यबा ब्यहोरे यायेमाः गु जुइ ।

अथेहे ज्या यानाच्वंम्हेसिया सतिक लाःम्ह सुं थःथिति मंत धाःसा विशेष विदा कयाः लिहां वयेदइगु व्यवस्था नं यानातःगु दुसा मरिससया कानुन कथं दुर्घटना बीमा व उपचारया व्यवस्था नं यानातःगु दु ।मरिससय् ज्या याःवंपिं ज्यामितय् पासपोर्ट रोजगारदाता कम्पनीं तयेदइमखु, ज्यामियात हे बियातयेमाःगु खँ नं समझदारीइ न्ह्यथनातःगु दु ।

थन ज्या याये सिधयेकाः नेपाः लिहां वइम्ह ज्यामियात रोजगारीया प्रमाणपत्र बीमाःगु खँ नं उल्लेख यानातःगु दु । व समझदारी जुइधुंकाः थुकिया प्रभावकारी कार्यान्वयन व ज्यामि भर्ना, रोजगारी व लित छ्वया हयेगु सम्बन्धी विषयय् लागत निर्धारण यायेगु विषयय् निगू देय्या प्रतिनिधि दथुइ मंकाः बैठक च्वनाः क्वःछिइगु खँ
धाःगु दु ।