अमेरिकाय् नेवाः बारे कार्यशाला

येँ – अमेरिकाया क्यालिफोर्नि राज्यस्थित टोपान्गा नांयागु शहरय् नेवाःतय्गु लिपि, संगीत, हुलाप्याखं आदि विषययात कयाः छगू कार्यशाला जुल । ज्याझ्वलय् नेपाल लिपि वर्कशप, नेवाः प्याखं, संगीत बारे न्वचु व ब्वज्या लिसें थीथी नेवाः कलाया नं ब्वज्या जूगु खः । याङचेन्मा आर्टस् एण्ड म्यूजिकया ग्वसालय् जूगु उगु ज्याझ्वःयात ‘म्यूजिका मन्डी नेपाल’ धइगु नां बियातःगु खः ।

ज्याझ्वःया न्हापांगु सत्रय् भाजु सुभाषराम प्रजापतिं अन सहभागी जूपिंत रञ्जना लिपि स्यनादीगु खः । उकी थीथी अमेरिकी नागरिकतय्सं नं रूची तयाः लिपि स्यना काःगु खः । अथे हे भाजु प्रज्वलरत्न वज्राचार्यं चचाप्याखं स्यनादीगु खः । निगूगु सत्रय् सुभाषराम प्रजापतिं नेपाःया संगीत बारे न्वचु बियादिल ।

न्वचु लिपा प्रजापतिया पुचलं धिमय्, धाः, नाय्खिं, क्वंचाखिं व मगःखिं थानाः न्ह्यब्वःगु खःसा प्रज्वलरत्न वज्राचार्यया पुचलं चचाप्याखं न्ह्यब्वःगु खः ।ज्याझ्वलय् न्हिच्छियंकं नेवाः बौद्ध संस्कृतिया थीथी हलंज्वलं व किपा ब्वज्या नं जूगु खः । ज्याझ्वलय् आपालं विदेशीत सहभागी जूगु खः ।