धिमय् बाजं कासाय् लूनिभाः उत्कृष्ट

ख्वप- ख्वप जिल्लास्तरीय निक्वःगु धिमय् बाजं धेंधेंबल्लाः कासा सिरुटारय् च्वंगु लूनिभाः धिमय् खलकं त्याकूगु दु । सरस्वति कला केन्द्रया ग्वसालय् जूगु कासाय् मध्यपुर थिमिया सिवाः साय्मि खलः ‘क’ लिउ, ख्वप नासमनाया न्हूजः धिमय् खलः लियांलिउ व सिवाः साय्मि खलःया हे मचा पुचः ‘ख’ समूहं हःपाः सिरपाः त्याकेत सफल जुल ।

कासाय् न्हाप लाःगु पुचलं झिंन्याद्वः तका दांलिसें उपाधि त्याकूगु खःसा वय्कःपिं सूर्यविनायक नगरपालिकाया प्रमुख वासुदेव थापां पदक दसिपौलिसें दां सिरपाः लःल्हानादीगु खः ।

ज्याझ्वःया शुरुइ हे दधिकोट पकाण्डोलया वाद्यगुरु कृष्णबहादुर मानन्धरयात दोसल्लां न्ययेकाः हनेज्या यासें न्ह्याःगु ज्याझ्वलय् नवासें मूपाहां नगर प्रमुख थापां नगरया मौलिक संस्कृति व कला संरक्षणय् स्थानीय तहलं आवश्यक ग्वाहालि यायेगु प्रतिवद्धता प्वंकादिल ।
मौलिक कला, संगीत व संस्कृति संरक्षणया निंतिं थःत पाना वयाच्वनादीम्ह महेन्द्र राजथलाप्रति विशेष आभार प्वंकादिसें नगर प्रमुख थापां सुसंस्कृत समाज निर्माणय् सांस्कृतिक ज्याझ्वः महत्वपूर्ण जुइ धासें थुकियात संरक्षण व संवद्र्धन यायेगु ज्याय् थम्हं न्ह्याबलें नं ग्वाहालि यानाच्वनेगु जुइ धयादिल ।

पुलांपिंत सम्मान व न्हू पुस्तायात प्रोत्साहन बीगु उद्देश्यं संस्थां थगुनेनिसें न्ह्याकूगु धिमय् बाजं कासाय् थगुनेया कासा त्याकूगु बाजं खलःया गुरुयात सम्मान याःगु खः । ज्याझ्वलय् वाद्यवादक पंचनारायण महर्जन व जुगल डंगोलं निर्णायकया भूमिका म्हितादीगु खः ।
मुक्कं झिंनिगू धिमय् बाजं पुचलं ब्वति काःगु कासाय् हुलाप्याखं नं न्ह्यब्वःगु खःसा ज्याझ्वःया संयोजन स्टार राजथलां यानादीगु खः । ज्याझ्वलय् स्थानीय समाजसेवी कृष्णलाल गोजा श्रेष्ठ, शिक्षासेवी बाबुकाजी कसपाल, प्राज्ञिक समाज दधिकोटया राजन विष्ट लगायत थीथी भजन गुथिया प्रतिनिधिपिनिगु उपस्थिति दुगु खः ।