सुरेन्द्र तुलाधरया अध्यक्षता सुखावतिया न्हूधाः

येँ– सुखावति मल्टि प्रोडेक्सनया ज्यासना पुचःया न्हूधाः जूगु दु । सुखावतिया आइतवाः जूगु न्हापांगु दँ मुँज्यां सुरेन्द्र तुलाधरया अध्यक्षताय् न्हूगु ज्यासना पुचः निस्वंगु खः । दँमुँजयां भोगेन्द्र मानन्धरयात न्वकु, निल शाक्ययात छ्याञ्जे, रञ्जना सितुखुयात दांभरि पदय् ल्यःगु खः । अथेहे मू दुजलय् रुमन जोशी, रामराजा भाम, रोहन प्रजापति, राजेश महर्जन, गंगाराम महर्जन व सुधा शाक्यपिंत ल्यःगु खः ।

सुखावति पाखें वइगु जेठ २६ गते नेपाल कलाकार स्वास्थ्य कोषया ग्वाहालिया निंतिं नेवाः कलाकार फुटसल कासा यायेत्यंगु दु । पकनाज्वलय् च्वंगु कुमारी फुटसलय् जुइगु उगु कासाय् उठे जुइगु ध्यबा स्वास्थ्य कोषय् तयेगु खँ सुखावतिया नायः सुरेन्द्र तुलाधरं कनादीगु दु ।

सुथसिया १० ताः निसें न्हिनसिया ४ ताःई तक जुइगु उगु कासाय् छगू टिमय् च्याम्ह च्याम्ह कलाकार दुथ्याकाः धेंधेंबल्लाः जुइ । फुटसलय् ब्वति कायेगु निंतिं छम्ह कलाकारं द्वःछि दां तयाः नां दुतिनेमाः । कासा लिपा उकुन्हु कासाय् ब्वति काःपिं सकल कलाकारपिंत कमलादी ब्यांक्वेटय् ककटेल डिनरया व्यवस्था यानातयागु खँ नायः तुलाधरं कनादीगु दु ।

सम्बन्धित बुखँ

LEAVE YOUR COMMENTS