चीन सरकारपाखें छत्रपाटी चिकित्सालययात सवारी साधन ग्वाहालि

येँ(नेपालभाषा टाइम्स)- चीन सरकारं थनया छत्रपातिइ च्वंगु छत्रपाति निःशुल्क चिकित्सालययात विद्युतीय सवारी साधन लःल्हाःगु दु । वंगु शनिवाः चिकित्सालय परिसरय् जूगु छगू ज्याझ्वःया दथुइ नेपाःस्थित चिनिया राजदूतावासं चिकित्सालययात विद्युतीय सवारी साधन लःल्हाःगु खः ।

ज्याझ्वलय् नवासें उपप्रधानमन्त्रीलिसें सहरी विकास मन्त्री प्रकाशमान सिंहं दूतावासं याःगु ग्वाहालिं नेपाः व चीन दथुया स्वापूया अझ क्वातुकीगु विश्वास प्वंकादिल । वय्कलं नेपाः जःलाखःला देय्लिसें अन्तर्राष्ट्रिय समुदायलिसे मैत्रीपूर्ण स्वापू तयाः न्ह्याः वनाच्वंगु दु धयादिल ।

विश्वव्यापी रुपय् जलवायु परिवर्तनं लिच्वः लाकाच्वंगु इलय् चिकित्सालययात विद्युतीय सवारी साधन उपलब्ध याकूगुलिं नं दूतावासप्रति वय्कलं आभार प्वंकादिल ।

नेपाःया निंतिं चिनिया राजदूत छन सङं नेपाःया आर्थिक विकास व समृद्धिया निंतिं चीनं ग्वाहालि याना वयाच्वंगु खँ न्ह्यथनादिसें निगू देय्या दथुइ थीथी ख्यलय् जुयाच्वंगु सहकार्यं महत्वपूर्ण व खने दयेक लिच्वः वयाच्वंगु दु धयादिल ।

चिकित्सालयया अध्यक्ष डा. मनोजमान श्रेष्ठं चीन सरकारपाखें प्राप्त ग्वाहालिया निंतिं सुभाय् देछासे वइगु दिनय् चीन सरकारपाखें

चिकित्सालयया निंतिं आवश्यक मेमेगु उपकरण नं ग्वाहालिकथं प्राप्त जुइगु विश्वास प्वंकादिल । उगु इलय् अध्यक्ष डा. श्रेष्ठं चिनिया राजदूत छङयात मतिनाया चिं नं लःल्हानादीगु खः ।

उगु इलय् पुलांम्ह मन्त्रीलिसें नेवाः न्ह्यलुवा राजेन्द्रप्रसाद श्रेष्ठ, येँ महानगरपालिकाया प्रवक्तालिसें १७ वडाअध्यक्ष नविन मानन्धर लगायतपिनिगु उपस्थिति दुगु खः ।