नेकां सांसद शर्मायात ज्वन

येँ (नेपालभाषा टाइम्स)- नेपाली कांग्रेसया सांसद सुनीलकुमार शर्मायात म्हिगः प्रहरीं ज्वंगु दु । शर्मायात केन्द्रीय अनुसन्धान ब्युरो (सीआईबी) या पुचलं गोल्फुटारय् च्वंगु वयागु छेँनं हे ज्वंगु खः । प्रहरीं सांसद शर्मायात शैक्षिक प्रमाणपत्र किर्ते याःगु द्वपनय् ज्वंगु खः ।

भारतया छगू शैक्षिक संस्थां जारी याःगु धाःगु प्रवीणता प्रमाणपत्र तहया शैक्षिक योग्यताया प्रमाणपत्र नक्कली लुइवं शर्मायात ज्वंगु खः । शर्माया लिसें मेपिं निम्हेसित नं ज्वंगु दु । तर मेपिं निम्हेसिया नां धाःसा सार्वजनिक याःगु मदुनि ।

शर्मा वंगु मंसिरय् क्वचाःगु निर्वाचनय् मोरङ ३ पाखें प्रत्यक्ष निर्वाचित जूगु खः । शर्मा काठमाडौं मेडिकल कलेज व विराटनगरय् च्वंगु नोबल मेडिकल कलेजया सञ्चालक नं खः । प्रहरीं ज्वनेवं शर्मायात सांसद पदं नं निलम्बन याइगु जूगु दु ।

वंगु छुं ई न्ह्यः शर्मां लुँ प्रकरणयात कयाः न्ववायेगु झ्वलय् संसदय् गृहमन्त्री नारायणकाजी श्रेष्ठ व अर्थमन्त्री प्रकाश शरण महतया राजीनामा फ्वंगु खः ।

शर्मायात नकली प्रमाणपत्रया केशय् ज्वंगु खः धाःसां ज्वंगुया खास कारण धाःसा लुँ काण्ड हे खः धाःगु दु । १०० किलो लुँ ज्वंगु काण्डय् शर्माया नं भाग दुगु खँ सार्वजनिक जूगु दु । शर्मा वंगु वालय् दुबई वंगु खःसा म्हीग नेपाः लिहां वःगु खः ।