‘संवैधानिक पदय् च्वनाः बार्गेनिङ याये दइमखु’

येँ – सत्तारुढ नेपाल कम्युनिष्ट पार्टी (नेकपा) या प्रमुख सचेतक देव गुरुङं संवैधानिक पदय् च्वनाः वार्गेनिङ मयायेत उपसभामुख शिवमाया तुम्बाहाम्फेयात इनाप यानादीगु दु । म्हिगः रिपोर्टर्स क्लबय् ग्वसाः ग्वःगु ज्याझ्वलय् न्ववायेगु झ्वलय् वय्कलं उगु खँ धयादीगु खः ।
ज्याझ्वलय् न्ववायेगु झ्वलय् सचेतक गुरुङं तुम्बाहाम्फें राजीनामा मबिउतले सभामुखया निर्णय यायेत पार्टीया दुने समस्या जुयाच्वंगु धासें संवैधानिक पदय् च्वनाः वार्गेनिङ मयायेत इनाप याःगु खः ।

वय्कलं छम्ह मनूया आकांक्षा पूवंकेत सदन अवरुद्ध याये मजिउगु खँ धासें संवैधानिक पदय् च्वनाः वार्गेनिङ यायेगु नैतिकता सुयातं मदुगु धासें अझ कम्युनिष्ट पार्टीइ ला झन हे स्वीकार्य मजुइगु खँ धयादीगु दु । संसदय् बहुमत दुगु नातां सभामुख नेकपाया हे जुइमाः धासें उकिया निंति उपसभामुखं लँ चायेकेमाःगु खँ कनादीगु दु । वय्कलं धयादीगु दु ‘यदि तुम्बाहाम्फे थः हे सभामुख जुइगु खःसां नं दकलय् न्हापां उपसभामुखं राजीनामा बीमाः । उपसभामुख पदय् च्वनाः वय्कलं सभामुखया उम्मेदवारी बी मजिउ ।’

वय्कलं धयादी, ‘उपसभामुख थःगु हे पार्टीया जूगुलिं संवैधानिक रुपं सभामुखया उम्मेदवारी बीत समस्या जूगुलिं उपसभामुखं राजीनामा बीमाः, वयां लिपा सभामुखय् सुयात हयेगु धइगुृ बारे निर्णय जुइ ।’ नेकपा दुने सभामुख ल्ययेगु बारे विवाद तच्वया वंगु दु । नेकपाया निम्ह अध्यक्ष मध्ये छम्ह अध्यक्ष लिसे प्रधानमन्त्री केपी शर्मा ओली पुलांम्ह सभामुख सुवास नेम्वाङयात हयेमाः धकाः अडान कयाच्वंगु दुसा मेखे पुलांम्ह प्रधानमन्त्री लिसे नेकपाया मेम्ह अध्यक्ष पुष्पकमल दाहालं अग्नी सापकोटायात सभामुख दयेकेमाः धकाः पार्टी दुने लबिङ यानाच्वंगु दु ।

मेखे राष्ट्रपति विद्यादेवी भण्डारीं धाःसा वर्तमान उपसभामुख तुम्बाहाम्फेयात हे सभामुख दयेकेमाः धकाः प्रधानमन्त्री ओलीयात दबाब बियाच्वंगु दु । राष्ट्रपतिया लिधंसाय् हे उपसभामुख तुम्बाहाम्फे राजीनामा बीत आनाकानी यानाच्वंगु जक मखुसें थःत हे सभामुख दयेकेमाः धकाः अडान कयाच्वंगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु