बालाजुइ सर्वसाधारण जनताया छेँ थुं वःगु डोजर अथें लिहां वन

येँ – स्थानीय जनतालिसे सहलह मयासे आः बालाजुइ डोजर चले याके मबीगु बचं सांसद रामवीर मानन्धरं बियादीगु दु । वंगु शनिवाः स्थानीय जनता व सतक पीडित संघर्ष समितिया दुजःत लिसे खँ ल्हायेगु झ्वलय् वय्कलं उगु बचं बियादीगु खँ स्थानीय महेश्वर मानन्धरं ‘नेपालभाषा टाइम्स’ यात कनादिल ।

लँ तब्या याये न्ह्यः स्थानीय जनता लिसे सहलह यायेगु व माःगु मुआब्जा बियाः जक छेँ थुनेगु व उकिया निंतिं माःगु भूमिका थम्हं म्हितेगु बचं नं सांसद मानन्धरं बियादीगु खः । शनिवाः ल्हुति पुन्हि न्ह्यःने वयाच्वंगु व सतक सफा यायेगु त्वहः तयाः स्थानीय जनताया छेँ थुने धकाः वःगु डोजरयात स्थानीय जनतां पना बिउगु खः ।

स्थानीय जनतां उगु लागाय् छेँ थुनेगु बारे सर्वोच्च अदालतय् मुद्दा विचाराधीन जुयाच्वंगु दु धकाः डोजर मालिकयात ध्वाथुइकेगु ज्या यायेवं डोजरया मालिक थःगु डोजर ज्वनाः लिहां वंगु जानकारी नं भाजु मानन्धरं बियादीगु दु । डोजर वयेवं स्थानीय जनता लिसें सतक विस्तार पीडित संघर्ष समितिया पदाधिकारी व स्थानीय क्लबया प्रतिनिधिपिंसं छेँ थुने दइ मखु धकाः विरोध याःगु खः ।

ल्हुतिइ न्हापा छेँ थुनेधुंकूगु थासय् थौंकन्हय् ट्याक्सी पार्किङ यायेगु ज्या जुयाच्वंगु दुसा आः अन दुगु ट्याक्सी पार्किङ चीकेगु नं सहमति जूगु खँ मानन्धरं कनादीगु दु । वय्कःया कथं स्थानीय ट्याक्सी व्यवसायीलिसे सहलह जुइधुंकाः संघया अध्यक्ष सिद्धि मानन्धर नं ट्याक्सी पार्किङ चीकेत सहमत जुयादीगु खः ।