निगमया वाइडबडी ‘मकालु’ भाद्र निसें जक ब्वइगु

येँ – नेपाल वायुसेवा निगमं हःगु लिपांगु वाइड बडी एयरबस ३३० भाद्र निसें जक नियमित उडानय् वनीगु जूगु दु । निगमय् पाइलटया अभाव जूगुलिं थ्व जहाजय् ब्वयेके मफयाच्वंगु खः । आः थ्व जहाजयात त्रिभुवन अन्तर्राष्ट्रिय विमानस्थलया ह्यांगरय् तयातःगु दु । निगमया प्रबन्ध निर्देशक सुगतरत्न कंसाकारं एयरबस ३३०या निंतिं पाइलट व्यवस्थापनया ज्या जुयाच्वंगु खँ धयादीगु दु ।

वय्कःया कथं च्याम्ह स्वदेशी पाइलट दुसा स्वम्हे विदेशी पाइलट वयेधुंकूगु दु । वय्कलं मकालु नां बियातःगु थ्व वाइड बडी जहाज ब्वयेमफुगु कारण नागरिक उड्डयन प्राधिकरणं यानाः मखु धासें थःपिनिगु हे आन्तरिक व्यवस्थापनया कारणं ब्वये मफुगु खँ धयादीगु दु । वय्कलं याकनं हे पाइलटया व्यवस्था यानाः जहाज भदौ दुने हे ब्वइगु खँ धयादीगु दु ।

आः थ्व विमानयात जापान व कोरियां अनुमति मबिउतलेया निंतिं निगमया पुलांगु हे गन्तव्यय् उडान याइ । निगमया कथं आः थ्व विमान हंगकंग, बैंकक, क्वालालाम्पुर, दोहो, बैंग्लोर व दुबइलय् ब्वइ । अथेहे सउदी अरबया रियादय् यंकेगु निंतिं नं खँ जुयाच्वंगु दु ।

निगमं हःगु न्हापांगु वाइडबडी एयरबस ३३० अन्नपूर्ण धाःसा फुक्क अध्ययन ज्या क्वचायेकाः नियमित उडानय् वनेधुंकूगु दु । अन्नपूर्ण विमानपाखें हे अध्ययन जुइधुंकूगुलिं अज्याःगु हे प्रकृति मकालु विमानं धाःसा आः न्हापांगुखुसी थें पूवंक अध्ययन यायेमालीमखु । मकालुं प्रभिङ फ्लाइट नं यायेमाली मखु ।