लँय् ग्राभेल जक याःगुलिं विरोध

येँ – जीर्ण सतक दयेकेत ध्यान मबिउगु धासें स्थानीय वासिन्दां जोरपाटी–गोकर्ण–सुन्दरीजल सतकय् अवरुद्ध याःगु दु । जीर्ण सतकय् ग्राभेल जक यानाः अथें त्वःतल धासें स्थानीय वासिन्दां सतक बन्द याःगु खः । सतक विस्तार यानाः पीच यायेत बोलपत्र आह्वान जूगु प्यदँ दयेधुंकाः नं ग्राभेल जक तःगुलिं समस्या जूगु खः ।

सतक जीर्ण जुयाः यात्रुया सुरक्षाय् तकं लिच्वः लाःगु खँ धाःगु दु ।सतकया थीथी थासय् गाः वनाः पुखू थें च्वनाः गुलिखे सवारी चालकत दुर्घटनाय् लानाच्वंगु खँ स्थानीय वासिन्दां धाःगु दु । सतक जीर्ण जूगुलिं सार्वजनिक सवारी साधन चले याये थाकुगु व यात्रीयात नं समस्या जूगुलिं सतक बन्द यायेमाःगु खँ स्थानीय वासिन्दां धाःगु दु ।

देशय् स्वंगू तहया सरकार वःसां नं थनया स्थानीय वासिन्दां अज्याःगु महसुस याये मफयाच्वंगु खँ स्थानीय वासिन्दा कुमार श्रेष्ठं कनादीगु दु । उगु सतकया केन्द्रविन्दु जवय् खवय् ११÷११ मिटर यानाः २२ मिटर सतक विस्तार यायेगु योजना दयेकातःगु खःसा स्थानीय वासिन्दां थःपिनिगु छेँ लाइगु व उकिया मुआब्जा माः धकाः आन्दोलन यायेगु लिसे सर्वोच्च अदालतय् मुद्दा तःगु खः ।

सर्वोच्च २०७४ असोज महिनाय् सतक विस्तार यायेगु खःसा स्थानीय जनतायात मुआब्जा बियाः जक सतक विस्तार यायेत आदेश बिउगु खः । आः उगु सतकया केन्द्रविन्दुया ७÷७ मिटर जःखः जक विस्तार यानाः जक दयेकेगु खँ गोकर्णेश्वर नगरपालिकाया प्रवक्ता मनोजकुमार ढुंगानां कनादीगु दु ।

आः निर्धारण जूगु मापदण्ड कथं सतक विस्तार यायेबलय् आपालं स्थानीय जनताया छेँ बचे जुइगु खँ धाःगु दु । थ्यंमथ्यं ७ किलोमिटर दुगु उगु सतक खण्डय् ९०० छेँखा दु ।

 

सम्बन्धित बुखँ

LEAVE YOUR COMMENTS