कपिलवस्तु युनेस्कोय् दर्ता
येँ (नेपालभाषा टाइम्स)- भगवान बुद्धं थःगु जीवनया २९ दँ व्यतित याःगु प्राचीन शाक्य गणतन्त्रया राजधानी तिलौराकोट कपिलवस्तुयात विश्व सम्पदाया धलखय् दुथ्याकेगु लागिं नेपाः सरकारपाखें युनेस्कोय् औपचारिक रुपं मनोनयन पेश याःगु दु । फ्रान्सया पेरिसय् च्वंगु विश्व सम्पदा केन्द्रया केन्द्रीय कार्यालयय् फ्रान्सया लागिं नेपाः राजदूत लिसें युनेस्कोया लागिं नेपाःया स्थायी प्रतिनिधि सुधिर भट्टराईं युनेस्को वल्र्ड हेरिटेज केन्द्रया निर्देशक लाजारे इलोन्डोयात म्हिगः थ्व प्रस्ताव लःल्हानादीगु खः ।
थ्व स्वयां न्ह्यः नेपाःपाखें युनेस्कोय् छ्वइगु उगु प्रस्तावय् संस्कृति मन्त्री लिसें लुम्बिनी विकास कोषया अध्यक्ष सुदन किरातीं हस्ताक्षर यानादीगु खः । नेपाःपाखें मन्त्रीया हस्ताक्षर सहितया थ्व प्रस्ताव औपचारिक रुपं दर्ता जुइधुंकाः आः कपिलवस्तुयात नं विश्व सम्पदाया धलखय् दुथ्याकेगु औपचारिक प्रक्रिया शुरु जूगु दु ।
लुम्बिनी विकास कोषया सदस्य सचिव सानुराजा शाक्यं म्हिगः छगू वक्तव्य पित बिसें थुकिया जानकारी बियादीगु खः । विज्ञप्तिइ धयातःकथं अन्तर्राष्ट्रिय रुपं नांजाःपिं आपालं पुरातत्वविद्त जानाः नेपाःया थ्व प्रस्ताव तयार याःगु खः । कपिलवस्तुयात विश्व सम्पदाया धलखय् दुथ्याकेगु लागिं औपचारिक प्रस्ताव दर्ता जुइ फुगु नं नेपाःया लागिं लसताया विषय जूगु खँ विज्ञप्तिइ धयातःगु दु । प्रस्तावय् बेलायतया दूरहाम विश्वविद्यालयया प्रा. रोविन कनिङघमया नेतृत्वय् कपिलवस्तुइ जूगु उत्खननं लुया वःगु तथ्य व विवरणत नं दुथ्याकूगु खः ।
कपिलवस्तुयात विश्व सम्पदाया धलखय् दुथ्याकेगु लागिं युनेस्कों सन् १९९५ स हे विश्व सम्पदाया सम्भावित सूचीइ समावेश याःगु खः । नेपाःपाखें सन् २०२५ तकया दुने कपिलवस्तुयात विश्व सम्पदाया धलखय् दुथ्याकेगु ताः तयाः प्रस्ताव तयार यायेगु ज्या न्ह्याकूगु खः ।
नेपाःपाखें औपचारिक रुपं प्रस्ताव दर्ता जुइधुंकाः आः युनेस्कोया विश्व सम्पदा केन्द्रपाखें मेमेपिं विज्ञत तयाः थुकिया अध्ययन याइ । लिसें युनेस्कोया छगू पुचः तिलौराकोट वनाः स्थलगत अध्ययन नं याइ तिनि । वयां लिपा उगु पुचलं युनेस्कोया सभाय् थःपिनि प्रतिवेदन लःल्हाइ । सभापाखें प्रतिवेदन पारित यात धाःसा विश्व सम्पदा धलखय् तिलौराकोट नं दुथ्याइ । थ्व ज्या पूवनेत दछि ति ई कायेफुगु खँ धाःगु दु ।
विश्व सम्पदा धखलय् बुद्ध जन्मभूमि लुम्बिनीयात दुथ्याका तयेधुंकूगु दु । थ्व धुंकाः रामग्रामयात नं दुथ्याकेगु बारे सहलह जुयाच्वंगु खँ सीदुगु दु ।
LEAVE YOUR COMMENTS