
येँ (नेपालभाषा टाइम्स)÷चितवनया रत्ननगर नगरपालिकास्थित एकता शिशु निकेतनया होस्टेलय् यगानाच्वंगु अवस्थाय् लूम्ह १४ दँया मय्जु शालीन पोखरेलया हत्या जूगु छुं प्रमाण लुया मवःनिसां थ्व सम्बन्धय् ज्वनातःपिं स्कुलया ६० दँ दुम्ह हेडसर बालहरि देवकोटा, ४० दँ दुम्ह सहायक हेडसर किरणबहादुर अधिकारी व ४८ दँ दुम्ह वार्डेन कमल शर्मा पौडेलयात धाःसा तत्काल मत्वःतीगु खँ धाःगु दु । स्कुलया थ्व पदाधिकारीपिनि विरुद्ध सीम्ह शालीनया ककां बिउगु किटानी जाहेरीया आधारय् प्रहरीं ज्वनातःगु खः ।
सीम्ह शालीनया पोष्ट मार्टम रिपोर्टं वयात बलात्कार जूगु वा स्याःगु पुष्टि मजुइधुंकल । लिसें शालीनं च्वयातःगु सुसाइड नोट नं व थम्हं हे च्वःगु खः धकाः प्रमाणित जुइधुंकूगु दु । आः वयागु भिसेरा रिपोर्ट छगू वये ल्यं दनि । अथे खःसां प्रहरीं थुकिया बारे पूवंक अनुसन्धान यायेमाःगु जूगुलिं ज्वनातःपिं स्वम्हेसितं हानं कुनेगु लागिं म्याद थप यायेत्यंगु खः ।
उगु स्कुलय् ८ तगिमय् ब्वनीम्ह शालीन सिनाच्वंगु लुल धइगु खबर वयेवं वया अबुं थः म्ह्याय्यात बलात्कार यानाः स्याःगु धकाः द्वपं बिउगु खः । शालीनया मांबौ निम्हं झिदँ न्ह्यः हे पारपाचुकाः अलग अलग च्वनेधुंकूगु दु । उपिं निम्हेस्यां अलग अलग इहिपा समेत यायेधुंकूगु दुसा थुकिं यानाः शालीनं याकःचा महसुस यानाः आत्महत्या याःगु जुइमाः धकाः अनुमान याना हःगु दु । थ्व प्रकरणय् आपालं खँ सार्वजनिक जुइधुंकूगुलिं थ्व हत्या हे खः धकाः सामाजिक सञ्जालय् च्वया हइपिं नं थौंकन्हय् मौन जुया वःगु खनेदु ।
LEAVE YOUR COMMENTS