जर्मनी व बेल्जियमय् खुसिबाः वयाः सीपिनिगु ल्याः ९० पुल

एजेन्सी- जर्मनी व बेल्जियमय् तसकं वा वयाः वःगु खुसिबालं यानाः ९० सिबें अप्वः मनूत सीगु दुसा सलंसः मनूत तनाच्वंगु दु । जर्मनीइ जक ८० म्हं मल्याक मनूत सीगु दुसा बेल्जियमय् ११ म्ह मनू सीगु दु ।

जर्मनीया पश्चिमी क्षेत्रय् वयाच्वंगु वाया प्रभाव बेल्जियम व नेदरल्यान्ड्सलिसें मेमेगु जःलाखःला देसय् नं लाःगु खः । नेदरल्यान्ड्सय् सलंसः छेँ दुनेवं उगु थासय् च्वपिं मनूतय्त सुरक्षित थासय् यंकूगु दु ।

जर्मनीया राइनल्याण्ड–पलाटिनेट व राइन–वेस्फेलियाय् खुसिबाः वयाः दकलय् अप्वः क्षति जूगु दु । राइनल्याण्ड–पलाटिनेट क्षेत्रय् १३०० सिबें अप्वः मनूत तनाच्वंगु दु । थुगु थासय् यक्व हे छेँ व गाडी चुइकायंकूगु दु । जर्मनीया राइनल्याण्ड–पलाटिनेटया प्रान्त प्रमुखं उद्धारया ज्या जुयाच्वंगु धाःगु दु । राइन–वेस्फेलिया प्रमुखं जलवायु परिवर्तनं यानाः थथे जूगु धाःगु दु ।

थ्व हे दथुइ अमेरिकाया भ्रमणय् दुम्ह जर्मनीया चान्सलरं एंगोलो मर्केलं थुकियात विपदया संज्ञा बिउगु दु । शुक्रवाः नं जर्मनीइ तसकं वा वःगु खः ।