प्यख्यरं जुयाच्वंगु अतिक्रमण

पचली भैलद्यः दुगु टेकुइ सामान्यत मनूत धार्मिक आस्था ज्वनाः सुथय् सुथय् अन थ्यनेगु याइ । द्यःया दर्शन यायेगु निंतिं वा छुं धार्मिक ज्याखँया निंतिं अन मुनेगु याइ । झन् बिदाया न्हि द्यःयाथाय् वइपिनि ल्याः अप्वः जुइ । थुगुसीया शनिवाः नं बिदाया न्हि जूगुलिं अनं आपालं मनूत वल । तर वकुन्हु सुथय्या लु भचा बिस्कं खनेदत । अन वःपिं मनूत पचली भैरव गुथिया जग्गा अतिक्रमण जुयाच्वंगुलिं उकिया बारे सहलह यायेत अन वःगु जुयाच्वन । काठमाडौं महानगरपालिका वडा नं १२ स्थित पचली भैरव गुथिया कित्ता नं. ७०या जग्गाय् श्री महेन्द्र सरस्वती सेवा आधारभूत विद्यालयं नियम अःखः भवन निर्माणया ज्या न्ह्याकाच्वंगु खँयात कयाः अन सहलह जूगु खत ।

पुखू सुना वनेधुंकाः श्री महेन्द्र सरस्वती विद्यालयं मस्त म्हितेगु ग्राउन्डया रुपय् छ्यला वयाच्वंगु जग्गाय् आः उगु हे विद्यालयं नियम अःखः भवन निर्माणया ज्या सुरु यायेवं विवाद पिहांवःगु खः । शनिवाः जूगु सहलह लिपा अन मुनाच्वंपिं सम्पदाप्रेमि, स्थानीयवासी व गुथियारतय्सं अवैध रुपं निर्माण यानाच्वंगु भवनया जग थुनाबिउगु खः । सम्पदा बचे यायेमाः धकाः स्यनेमाःगु विद्यालय स्वयमं सम्पदा क्षेत्र अतिक्रमण यानाः भवन निर्माण यायेगु ज्या याःसा अज्याःगु विद्यालयं विद्यार्थीतय्त गज्याःगु स्तरया शिक्षा बी धकाः झीसं अनुमान याये फइ । अझ सम्पदा अतिक्रमण यानाच्वंगु विद्यालयय् ब्वनावइपिं विद्यार्थीतय्सं सम्पदा क्षेत्रया महत्व थुइकीगु ला सम्भावना हे मदु ।

थ्व स्वयां न्ह्यः किपू नगरपालिका वडा नं. ५ स्थित सलिख्यलय् दुगु पुखू अतिक्रमण यानाः दनेत्यंगु छेँ स्थानीयतय्सं थुनाबिउगु खः । कित्ता नं. २०५ य् दुगु बुंगाःचायात अतिक्रमण यानाः दयेकेत्यंगु छेँया डीपीसी व प्यंगः पिलर स्थानीय जनतां थुना बिउगु खः ।छगू लिपा मेगु यानाः स्थानीय जनता, सम्पदापे्रमि अले गुथियारत हे मिले जुयाः अज्याःगु अतिक्रमणय् लानाच्वंगु पुखू, हिति अले जग्गाया बचाउ यायेगु अभियान न्ह्यानाच्वंगु दु ।

झीगु पुखू, हिति, झीगु सम्पदा खः । छुं ईया दुने गन गन थज्याःगु सम्पदाय् अतिक्रमण जुयाच्वंगु खः धकाः आपालं खँ पिहां वयेधुंकूगु दु । अले बुलुहुँ थज्याःगु ज्याय् संलग्नतय् ख्वाःपाः झीगु न्ह्यःने उजागर जुइधुंकूगु दु ।

यलया सप्तपाताल पुुखूया जग्गाय् नं नमूना मच्छिन्द्र स्कूलं अतिक्रमण याना वयाच्वंगु खः । स्थानीयतय्सं ताः ई तक याःगु संघर्ष लिपा सर्वोच्च अदालतं पुखूयात पुलांगु हे स्वरुपय् हयेत आदेश बीवं सप्तपातालय् नमूना स्कूलं यानाच्वंगु जग्गा अतिक्रमण आः बल्ल दिउगु खः ।
सार्वजनिक जग्गाय् जुयाच्वंगु थज्याःगु अतिक्रमणया झ्वः थुलि जक मखु ।

आः स्थानीय जनता थज्याःगु सम्पदाया बारे महत्व थुइका वःगुलिं अतिक्रमित जग्गाया बारे बिस्तारं खँ पिहां वयाच्वंगु खः । अझ नं अज्याःगु अतिक्रमण यानातःगु जग्गात स्वनिगः दुने आपालं दनि । गन गन सार्वजनिक जग्गा अतिक्रमण जुयाच्वंगु खः फुक्कं मालाः सार्वजनिक याये हथाय् जुइधुंकूगु दु । विशेष यानाः थीथी गुथि नाप दुगु जग्गात अतिक्रमण यानाः अन अवैध तवरं भौतिक संरचना दयेकेगु ज्या जुयाच्वंगु दु । सरकारं गुथिया अस्तित्व हे मदयेकीगु कथं गुथि विधेयक हःगु यक्व मदुनि । गुथि विधेयक गज्याःगु मनसाय तयाः हःगु धइगु झीसं बांलाक वाःचायेधुंकूगु दु । छखे सरकारयापाखें हे गुथिया अस्तित्व नाश यायेगु कथं कानून निर्माणया ज्या न्ह्याकाच्वंगु दुसा मेखे गुथि लगायत सार्वजनिक जग्गात थीथी पक्षत जानाः अतिक्रमण यायेगु ज्या जुयाच्वंगु दु ।

गुथि विधेयक सम्बन्धि कानून निर्माण यायेगु ज्याय् सरकारं एकपक्षीय रुपं सम्बन्धित पक्षनाप सहलह मयासे हःगु खत । उकिं विधेयकया सम्बन्धय् सरकारया बदनियत तप्यंक खंकेफु । उकिया बारे सरोकारवाला फुक्क पक्ष सजग जुइधुंकूगु दु । तर जग्गा अतिक्रमणया सन्दर्भय् केवल सरकारया लाचारी व बदमासी जक मदु । थुकी दुने आपालं पक्षत दु । येँया थँबहिली च्वंगु पलेस्वां पुखूया च्वय् दनातःगु व्यापारिक भवन जक स्वयेगु खःसा अन केवल सरकारी पक्षया बदमासी जक मखु धकाः पुष्टि जुइ । पुखू धकाः सीक सीक अन व्यापारिक कम्प्लेक्स दयेकीपिं व्यापारीतय् बदमासी नं उलि हे दु । अले अज्याःपिं व्यापारीतय्त जग्गा मिले याइपिं भूमाफियातय् भूमिकायात नं ल्वःमंके फइमखु ।

अझ गुलि थासय् पुखूया जग्गायात ल्हाकाः पार्किङ दयेकातःगु, वृद्धाश्रम दयेकेगु कुतः जुयाच्वंगु दु । तसकं विडम्बना थज्याःगु ज्या स्थानीय जनप्रतिनिधितय् सक्रियताय् हे जुयाच्वंगु दु । अझ उमिसं तर्क यानाच्वनी की दुई इञ्च जग्गा, दुई आना जग्गा कयां छुं पाइ मखु । सार्वजनिक जग्गा उकी नं सम्पदा क्षेत्रया जग्गाया छगू ईञ्च नं सुयातं कायेगु अधिकार मदु । थ्व खँ स्थानीय जनप्रतिनिधितय्सं मेपिंत थुइकेमाःगु पलेसा अःखतं थःपिंसं हे जग्गा मिचे यायेगु ज्या यानाच्वंगु तसकं दुःखपूर्ण जू ।

झीगु पुखू, हिति, झीगु सम्पदा खः । छुं ईया दुने गन गन थज्याःगु सम्पदाय् अतिक्रमण जुयाच्वंगु खः धकाः आपालं खँ पिहां वयेधुंकूगु दु । अले बुलुहुँ थज्याःगु ज्याय् संलग्नतय् ख्वाःपाः झीगु न्ह्यःने उजागर जुइधुंकूगु दु । झीसं खना, झीगु सम्पदायात स्यंकेगु निंतिं केवल राज्य संचालनय् दुपिं मनूत जक मखु मेगु आपालं ख्यःया मनूत नं सक्रिय जुयाच्वंगु दु । गनं गनं झी दुने दुपिं मनूतय्सं तकं उकियात साथ व समर्थन यानाच्वंगु दु । उकिं थज्याःगु सम्पदा विरोधी तत्वतपाखें झी सजग व सचेत जुइमाःगु आवश्यकता दु । अले सम्पदा ल्यंकेगु निंतिं फुक्क थाय्या सम्पदाप्रेमीत एकीकृत जुयाः न्ह्यचिलेमाःगु खनेदु । यदि एकीकृत जुयाः न्ह्याः वनेफुसा झीगु आपालं संस्कृति व सम्पदात सुरक्षित जुइफइ । अले कन्हय्या पुस्तां अज्याःगु संस्कृति व सम्पदा स्वयाः छ्यँ धस्वाकाः म्वानाः च्वनेफइ ।