व्यापार घाटा च्यागू खर्बं थहां वन
येँ – वंगु गुलाया दुने नेपाःया व्यापार घाटा ८ खर्ब स्वयां अप्वःगु दु । भन्सार विभागया कथं वंगु गुलाया दुने ८ खर्ब ७४ अर्ब तकाया सामान आयात जूगु दुसा निर्यात धाःसा ५९ अर्ब बराबरया जक जूगु दु । चालु आवया गुलाया दुने नेपाःया व्यापार घाटा ८ खर्ब १५ अर्ब तका थ्यंगु दु । उगु व्यापार घाटा वंगु दँया तुलनाय् २१ प्रतिशतं अप्वःगु खः ।
वंगु आर्थिक दँ २०७३÷०७४ स उगु हे ईया दुने नेपाःया व्यापार घाटा ६ खर्ब ७० अर्ब दुगु खःसा थुगु दँय् २ खर्ब स्वयां अप्वःगु खः । व्यापार घाटा म्हो यायेत सरकारं थीथी योजना हःसां नं व्यापार घाटा धाःसा म्हो जुइगु स्वयां अप्वया वनाच्वंगु दु ।
व्यापार घाटा दकलय् अप्वः भारतलिसे जुयाच्वंगु दु ।
भारत लिसे जक ६६ प्रतिशत व्यापार घाटा जुयाच्वंगु दु । गुलाया दुने भारतं जक ५ खर्ब ७६ अर्ब तकाया सामान आयात जूगु भन्सार विभागया तथ्यांकय् न्ह्यथनातःगु दु । वयां लिपा चीनलिसे व्यापार घाटा जुयाच्वंगु दु । चीनं जक गुलाया दुने १ खर्ब १३ अर्ब तकाया सामान आयात जूगु दु ।
नेपालं भारतय् व चीनय् धाःसा झ्वलिक ३४ अर्ब व २ अर्ब तकाया जक सामान निर्यात जूगु दु । नेपालं निर्यात जुइगु ६ प्रतिशत जक जुयाच्वंगु दुसा आयात धाःसा ९४ प्रतिशत जुयाच्वंगु दु । थ्व ल्याखं निर्यात स्वयां आयात ११ गुणां अप्वयाच्वंगु दु ।
LEAVE YOUR COMMENTS