ने. सं. ११४४ कौलाथ्व पारू - नःलास्वनेगु

एनआरएनया नेपाः प्रवद्र्धन दँ सुरु

येँ – सन् २०२० यात नेपाल भ्रमण दँ धकाः घोषणा यानातःगुयात ताःलाकेगु निंतिं गैरआवासी नेपाली संघं नेपाल प्रवद्र्धन दँ २०१९ हनेगु सुरु याःगु दु । संघं येँय् छगू पत्रकार सम्मेलन यानाः सरकारं सन् २०२० यात नेपाल भ्रमण दँ घोषणा यानाः थ्व दँय् नीगू लाख पर्यटक दुत हयेगु लक्ष्य तयातःगुयात ताःलाकेगु निंतिं नेपाल प्रवद्र्धन दँ न्ह्याकागु जानकारी बिउगु खः ।

प्रवद्र्धन दँया निंतिं संघया अध्यक्ष भवन भट्टया अध्यक्षताय्, सह कोषाध्यक्ष सोमनाथ सापकोटाया संयोजकत्वय् २१३ म्ह दुजः दुगु मूल समारोह समिति गठन याःगु दु । संघं पर्यटन प्रवद्र्धनया निंतिं थीथी देशय् ‘छम्ह पासायात थःगु देशय् छ्वये’, ‘गौतमबुद्ध नेपालय् बूगु खः’, ‘अतिथि देवः भवः’ नामं थीथी प्रवद्र्धनात्मक ज्याझ्वः याइ ।

थ्व कार्यक्रम अन्तर्गत संघया दुजःतय्सं थः च्वनाच्वनागु देशं छम्हेस्यां म्होतिं नं छम्ह पर्यटकयात नेपाः छ्वयेगु निंतिं प्रेरित यायेगु अभियान न्ह्याकेगु लिसें विदेशय् च्वनाच्वंपिं नेपालीतय्सं थःगु देय्या संस्कार, संस्कृतिया जानकारी बीत थीथी महोत्सव यायेगु ज्या जुइ ।
संघया अध्यक्ष भवन भट्टं सरकारं सन् २०२०य् २० लाख पर्यटक दुत हयेगु लक्ष्य तयातःगुयात ग्वाहालि यायेत विदेशय् च्वनाच्वंपिं सकलें नेपाःमियात इनाप नं यानादीगु दु ।

नेपाल पर्यटन बोर्डया कार्यकारी अधिकृत दीपकराज जोशीं पर्यटन वर्ष सफल यायेत एनआरएनया थ्व अभियान तसकं महत्वपूर्ण जुइगु खँ धयादिल । वय्कलं विशेषतः पर्यटकत नेपाः वइगु ई कात्तिक, मंसिर व पुस महिनाय् लाःसां दछियंकं पर्यटक नेपाः दुत हयेगु निंतिं ज्या यायेमाःगु खँ कनादिल । संघं नेपाः सरकार, पर्यटन बोर्ड लिसें सम्बन्धीत देय्या नेपाली राजदूतावास, नियोग व सम्बन्धित निकायलिसे जानाः प्रवद्र्धनात्मक ज्याझ्वः याइ ।