तल मखुला मास्क ?

‘जि नकतिनि प्रधानमन्त्री जुयादीगु इलय् स्वनिगःया बछि स्वयां अप्वः मनूतय्सं मास्क तया जुइगु, आः अथे मास्क तया जुइ म्वाःले धुंकल, छाय्कि स्वनिगलय् आः न्हापा थें धू मब्वयेधुंकल’ थ्व धापू खः झी प्रधानमन्त्री खड्गप्रसाद (केपी) ओलीया । आः नं मास्क तयाः जुल धाःसा इपिं सरकारया विरोधी हँ !

सरकारया विरोध यायेगु खःसा मास्क तया जूसां जिउ हँ ! छु छिकपिंसं नं मास्क तया जुया ला ? यदि मास्क तयाः जुइगु यानादीगु दुसा छिकपिं दक्वं सरकार विरोधी हँ ! सरकारयात असफल यायेत मास्क तया जूगु हँ ! जितःला सरकार विरोधी धाःसां छु धकाः !? अथेला सरकारं समर्थन यायेबहगु ज्या याःगु हे छु दु धकाः ? तर नेकपाया कार्यकर्ता, सरकारी कर्मचारीतय्त धकाः दकलय् आपत ले ।

मास्क तये धाःसा सरकारया विरोधी जुइगु । मतये धाःसा सासः ल्हायेत हे थाकु । मास्क तल धाःसा सरकार विरोधी धाइ । अले थःगु हे दलया सरकारया विरोध नं गथे यानाः यायेगु । अथेला नेकपाया कार्यकर्तातय् जक मखु, दक्वं राजनीतिक दलया कार्यकर्तात नेतातय्, सरकारया अले दलया च्यःत ।

दकलय् तःधंगु आपतला नेकपाया कार्यकर्तातय्त धकाःसा जुयाच्वन । मास्क तल कि ला थःगु हे सरकारया विरोध यात धाइ, मतये धाःसा धू व कुं यानाः मास्क मतसे लँय् जुइत हे थाकु । उकिं मास्क तयाः सरकारया विरोधी धकाः क्यने ला मजिल नि ! आः व कुँ व धू नयाः याकनं परमधाम वने माःसा विना मास्क ला जुइ हे माल नि !

थम्हं नयागु भुइ प्वाः ला खने मजिल नि मखुला, कि गथे ?नेकपाया कार्यकर्तातय्त नं थ्व छु दसां कःगु जुइ धकाः विचाः यानाच्वनागु ला जिमि कायं वयाः ‘बाः, बाः, जिला तःधिकः जुल कि ‘डन’ जुइगु न्हि’ धकाः थपाय् थपाय्सकं हालाः जिगु विचाःयात हे भंग यानाबिल का, व जाग्वारा मचां ।

‘मेमेपिनि मस्त जूसा डाक्टर, इन्जिनियर, पाइटल छु छु जुइ धकाः धाइ । छ छाय् डन जुइगु ?’ धकाः न्यनां ला ‘डन जुल कि राजनीतिक दलया नेता, सांसद अले मन्त्रि, प्रधानमन्त्री नापं जुइखनी धकाः का’ धाल बाः …. !वास्तवय् व जाग्वारां मचां सि हे मसिउ खनि कि प्रधानमन्त्री जुइत डन हे जुइमाः धयागु मदु, उखान टुक्का, जोक्स अले भाषण जक न्ह्यइपुक यानाः सकसितं न्हिइके फत धाःसां गाः ।

अझ ला प्रधानमन्त्री जुइत फटाहा फटाहा खँ ल्हाये सल धाःसा ला दकलय् योग्यम्ह जुइका । अथे ला झी प्रधानमन्त्री उखान टुक्का धायेगुलिइ, जोक्स कनेगुलिइ व विपक्षीयात व्यंग्य नकेगुलिइ ला हेडमास्तर हे खः । वय्कःया भाषण जक न्यनयेबलय् हास्य संकिपा हे स्वयेमाः धइगु मदु ।

झी प्रधानमन्त्रीं न्हिइका च्वन कि ला ध्यबा पुलाः संकिपा स्वया च्वनेमाःगु हे छाय् ? स्वयेमाःगु हे आवश्यक मदु । बरु आः धाःसा हास्य संकिपा दयेकीपिं निर्मातात होसियार जुइमाली । छाय् धाःसा छिकपिनिगु पेशा झी प्रधानमन्त्रीं कायेत्यंगु दु । लिपांगु इलय् चर्चाय् वःगु छगू विषय खः आइफा अवार्ड ।

उगु अवार्ड ज्याझ्वःया निंतिं सरकारं १ गू अर्ब बीगु खँ व्यापक चर्चाय् वल । सरकारं १ गू अर्ब दां खर्च यानाः आइफा अवार्ड याये धकाः गपाय्सकं रहर यानाच्वंगु ला नेपाःमितय्सं घोर विरोध यानाः उकियात रोके यानाबिल । थ्व नेपाःमित धाःपिं नं गजब हे खः का । मेलम्चीया लः आतक छाय् मवःगु विरोध मयाः ।

सरकारया गपाय्सकं रहर यानाच्वंगु आइफा अवाडया विरोध यानाच्वन । आः व आइफाया विरोध यानां छु जुइ धकाः ? नेपाःया छगू अर्ब दां जक ला फुइगु खःनि । व नं सरकारय् च्वंपिनिगु निजी सम्पत्ति फुइगु खः हे मखु, हे सर्वसाधारण नागरिकया ध्वबा फुइगु ला खः नि । आः नागरिकया १ गू अर्ब ध्यबा खर्च जुलं छु स्यनी धकाः ?

आइफा अवार्ड नेपालय् जूगु खःसा बलिउडया बांबांलाःपिं, चिचिहाकःगु वसः पुना वइपिं, सेक्सी सेक्सी हिरोनीत ला स्वये खनी । उकिसनं आइफा अवार्ड जुल कि ला नेपालय् ग्वाःग्वाः पर्यटक वइ हँ ! विश्वन्यंकंया ग्वाःग्वाः पर्यटक नेपाः वल धाःसा ला अर्बौं जक मखु खर्बौं खर्ब डलर दुहां वइ, मखुला ओलीजु ? छु सिउपिं धकाः खाली विरोध जक याये दःसा गाः ।

थ्व आइफाया विरोध याःपिंसं नेपाल सरकार, सांसद, पर्यटन बोर्ड अले चलचित्र विकास बोर्डं धाःगु खँ बांलाक मसिउ थें च्वं ! आइफा अवार्ड यात कि नेपाःया पर्यटन प्रवद्र्धन जुइ हँ । अले वइगु सन् २०२० य् जुइत्यंगु नेपाल भ्रमण वर्षयात नं ग्वाहालि जुइ हँ ! आइफा अवार्ड विश्वया ६० गू देशय् स्वइ, अले ला नेपाःया नं प्रचार प्रसार जुइ हँ नि सा ।

अहो ! नेपालय् आइफा अवार्ड याये खन धाःसा ला विश्वया पर्यटकत ग्वाःग्वाः हे नेपाः वइ हँ ! नेपाःया कला, संस्कृति, सांस्कृतिक, धार्मिक, ऐतिहासिक, पुरातात्विक महत्वया सम्पदा, जात्रापात्रा, नखःचखः, नेपाःया प्राकृतिक सौन्दर्यता, देग, फल्चा, सतः स्वयेत मखु, आइफा जुल धाःसा पर्यटक ग्वाःग्वाः वइ हँ ।

थज्याःगु खँ मसिउपिं गज्याःपिं जाग्वारात धाःसां नि खालि सरकारया विरोध, गथे यानाः जिउ, गुकथं जिउ, छु यानां जिउ, सरकारया विरोध याये दःसा गाः । उलि याये दत कि जिल का । विरोध जकं यानाः जी ला धइगु का मखुला गोकुलजु ? सरकार, सांसद, पर्यटन बोर्ड चलचित्र विकास बोर्डया थें बुद्धि दयेमाःका, छु सिउपिं धकाः ? मखुला केशव भट्टराईजु ।

नेपालय् आइफा अवार्ड यायेगु धइगु बलिउडया हिरो–हिरोनीत नेपालय् वइगु ला जु हे जु । उकिया नापनापं विश्वय् हे नेपाःया बारे प्रचारप्रसार जुयाः नेपाःया पर्यटनया नं प्रवद्र्धन जुइ । अले नेपालय् ग्वाःग्वाः पर्यटक वःगु स्वयेगु झी प्रधानमन्त्री व संचारमन्त्रीया गज्याःगु रहर । तर आम जनतां विरोध यानाः …. !

आइफा यातकि नेपाःया पर्यटनया प्रवद्र्धन जुइ, पर्यटकत ग्वाःग्वाः दुहां वइ धकाः धायेक धायेकं नं विरोध याइपिं ला बुद्धि धइगु भ्याः भचा हे मदुपिं जाग्वारत का मखुला ओलीजु ? मखु ….. थ्व विरोध याइपिनि मेगु छुं ज्या नं मदु ला कि छु ? सरकारं न्ह्यागु ज्या याःसां विरोध जक याइगु । आः गुथि विधेयक हल, उकिया नं विरोध यानाः लखौंलख नेवाःत सतकय् कुहां वयाः सरकारयात हे थारा न्हुइका बिल ।

थ्व नेवाःत धइपिं नं तसकं हे ग्यानापुपिं लानाच्वन का । तं पिहां वल धाःसा जिलाजं सिलाजं नं धाइपिं मखु । गुथि विधेयक हःसां विरोध, मानव अधिकारया विधेयक हःसां विरोध, विज्ञापन एजेन्सी ऐनया नं विरोध, मिडिया काउन्सिलया नं विरोध, आइफा अवार्ड याये धयां उकिया नं विरोध, आः मास्क तये म्वाःल धयां नं विरोध, पानी जहाज, रेल ब्वाके धाःसां विरोध, भारतं वइगु तरकारि व सिसाबुसाय् विषादी परीक्षण यायेमखु धयां नं भारत भक्त धकाः विरोध यानाः क्यन ।

थ्व छु धइगु नि ? न्हापा न्हापा अथे गबलें विरोध यायेम्वाः, आः ओली सरकारया पालय् जक छाय् विरोध यायेमाःगु मखुला ? ओलीजु ? छु ओलीया सरकारजक चिरिमांया काय खःला ?