आत्मसमीक्षाया बांलाःगु सुरुवात

थुगुसी नेपालभाषा साहित्य तःमुँज्यां स्वीच्यादँ लिपा न्हापांखुसि तःमुँज्या जूगु प्यन्हु लिपा हे तःमुँज्याय् प्रस्तुत जूगु साहित्य व सांस्कृतिक विधाया आत्मसमीक्षा यात । थज्याःगु ज्या न्हापा न्हापा जूगु खःसां उकियात उलि महत्व बियाः याःगु खनेमदु ।

थुगुसी धाःसा तःमुँज्याया मूपाहां नेमकिपाया अध्यक्ष नारायणमान बिजुक्छेँ रोहित, पाहां नेमकिपाया केन्द्रीय सचिव सांसद प्रेम सुवाल, तःमुँज्या मूगुथिया छ्याञ्जे व ३ नम्बर प्रदेशया सांसद सुरेन्द्रराज गोसाई नापं तःमुँज्या मूगुथिया नायः चन्द्रबहादुर उलकपिं थःथः हे जक च्वनाः जूसां दुग्यंक आत्मसमीक्षा यात ।

थज्याःगु ज्यां थःपिनि कमी कमजोरीयात आः लिपा गुकथं सुधार याना वनेगु धइगु खँयात बः बिउगु खनेदु । स्वयेबलय् थ्व छगू आत्मप्रशंसा वा आत्मरती थें च्वंसां थ्व ज्यां लिपा लिपा सुधार यायेत लँपु चालीगु खँय् धाःसा निगू मत दइमखु । न्हापा न्हापा थथे लेखक, कलाकार व सांस्कृतिक विधाया न्ह्यलुवात ब्वनाः समीक्षा याःगु खनेमदु ।

थुगुसी थज्याःगु ज्या यानाः तःमुँज्यां छगू कथं स्वीच्यादँ लिपा हे जूसां आः मेगु इलय् गुकथं न्ह्यज्यायेमाली धइगु खँ स्पष्ट यायेत स्वःगु खनेदु । साहित्यकारतय् दबू स्वयां नं भाषण व प्रवचन न्यंकेगु दबू कथं नेपालभाषा साहित्य तःमुँज्याया दबू हिलावंगु सः ताःई न्ह्यवंनिसें सः थ्वयेधुंकूगु खः । थुगुसी ला दबुलिइ हे उकिया तसकं आलोचना जुल ।

नेपालभाषा साहित्य आन्दोलनया इतिहासयात आः नं च्वन्ह्याका यंकेगु खःसा नेपालभाषा साहित्य तःमुँज्या थेंज्याःगु सक्षम व सवल संस्थां हे नेतृत्वदायि भूमिका म्हितेमाः ।

झिंन्यादँ तक सांस्कृतिक विधा प्रस्तुत यानाः नं छुं छुं सिरपाः बिइगु चलन मदुगु इलय् मदुम्ह नांजाःम्ह कलाकार व निर्देशक रामशेखर नकःमिं यःसिंख्यःया दबुलिं आः सांस्कृतिक बिधायात नं सिरपाःया बन्दोबस्त यायेमाल धकाः खँ तयेवं वयां लिपांगु दँनिसें सांस्कृतिक विधाया मूल्यांकन याइपिं मूंल्याकन टोली हे खटे यानाः मूंल्याकन यायेगु चलन जुल ।

नासमना त्वालय् जूगु तःमुँज्याया सिरपा क्वाठण्डलीइ लिपांगु न्हि कुन्हु बिल । थुगुसी स्वीच्याक्वःगु नेपालभाषा साहित्य तःमुँज्याया दबुलिं ख्वपया प्रमुख जिल्ला अधिकारी नारायणप्रसाद भट्टं न्हापांगु दिंया न्हापांम्ह वक्ताया रुपय् न्ववानादिसें तःमुँज्याया दबू भाषण दबू कथं परिणत जूगु सत्यतायात कुलादिसें थ्व दबूयात सर्जक व साहित्यकारतय्गु दबू कथं हे कायम याये फयेकेमाःगु सुझाब बियादीगु खः ।

उकियात हे ध्यानय् तयाः न्हापांखुसि थ्व समीक्षा जूगु खः ला धइगु खनेदु । ततःधंगु दबू अथे हे भाषण जक यानाः क्वचायेका च्वंगु इलय् न्हापांखुसि कलाया बारे समीक्षा यानाः थुगुसी भाषा, कला व साहित्यया लागाय् तःमुँज्यां छगू कथं महत्वपूर्ण पलाः ल्ह्वंगु खनेदु ।

उकिसनं मूपाहां नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं नं तःमुँज्याया दबुलिं हे न्हापांखुसि नेपालभाषाया माध्यमं नं पत्रकारिता यायेमाःगु व उकिया लागिं छगू प्रकाशन गृह तयार यायेगुलि नेपालभाषा साहित्य तःमुँज्यां ध्यान तयेमाःगु थेंज्याःगु खँ कनादिल ।

नेपालभाषा साहित्य तःमुँज्या सुरुवात याये न्ह्यः वा पीदँ न्ह्यः रोहितं थ्व खँ वाः चायेकेमाःगु खः । अब्लेनिसें ख्वपं नं झीसं नेपालभाषाया माध्यमं पत्रकारिता यायेमाः धइगु भावना ब्वलंके फयेकेमाःगु खः । छाय्धाःसा ख्वपं आपालं स्वनिगः त्वःताः पिने वंपिंसं ख्वपयात हे थःपिनि पुलांगु थाय् कथं हे नालाच्वंगु कारणं थन याइगु भाषिक नेतृत्वया तःधंगु महत्व दयाच्वनी ।

आः वयाः तिनि ख्वपया छम्ह न्ह्यलुवाः व्यक्तिं ख्वपं भाषिक पत्रकारिता यायेमाःगु खँय् बः बियादिल । तर लिबाक छेँय्् लिहां वःम्ह मनूयात तंम्ह धाये मजिउ धायेथें रोहित आः वयाः जूसां खःगु लँपुइ थ्यंगु दु । ख्वपं नं नेपालभाषाया माध्यमं पत्रकारिता यायेमाः धइगु धारणाय् थ्यंगु दु ।

आपालं पत्रपत्रिका, रेडियो व टेलिभिजनय् नेपालभाषाया बुखँ व ज्याझ्वः चले जुयाच्वंगु थ्व इलय् उगु खँ ल्हायेत रोहित बाध्य जूगु नं सकारात्मक पक्ष कथं नालेमाः । खय्त ला थौं स्वयां च्यादँ झिदँ न्ह्यः हे यःसिं ख्यलय् जूगु तःमुँज्याया सांस्कृतिक विधाया सिरपा लःल्हायेगु निंतिं आदर्श आजाद माविइ जूगु सम्ये बजी ज्याझ्वलय् नेपाल टेलिभिजन व कान्तिपुर थेंज्याःगु टेलिभिजनं गबलें हे जनताया खँ न्ह्यब्वयेगु ज्या मयाःगुलिं आः नेमकिपां थःपिनिगु हे टेलिभिजन चले यायेगु घोषणा यानादीगु खः ।

अबलय् घोषणा याःगु ज्या आः तकं थाति हे लानाच्वंसां थुगुसी धाःसा दबूपाखें हे प्रमुख जिल्ला अधिकारीं मनय् थीक न्ववानादीगु व मूपाहांया थासं रोहित थःम्हेसिनं हे नेपालभाषाया माध्यमं नं ख्वपं पत्रकारिता यायेमाःगु महसुस यानादीगु कारणं थ्व इलय् धाःसा ख्वपय् भाषाय् छुं जुइ ला धयागु आशा कायेगु थाय् ब्वलंगु दु ।

नीदँ न्ह्यः नं सन्ध्याकालीन थेंज्याःगु छगू पत्रिका चले यायेफइगु महसुस यायेवं मजदुर दैनिकया जन्म जूगु खः । आः नेपालभाषाया छगू पत्रिका पिहां वःसा बांलाःगु पक्ष हे जुइ ।ख्वप देसय् न्हापा न्हापा नं नेपालभाषां पत्रिका पिथनेगु कुतः मजूगु मखु । लुँझ्याः, ख्वप टाइम्स, यःमरी नांयागु नेपालभाषाया पत्रिका पिथनेगु निंतिं जिल्ला प्रशासन कार्यालयय् उगु पत्रिकात दर्ता जुयाच्वंगु दु ।

अथेनं राजनीतिक व आर्थिक कारणं आः तक नं थ्व ज्या थातं लानाच्वंगु दनि । थ्व फुक्कं खँयात ध्यानय् तयेगु इलय् नेपालभाषा साहित्य तःमुँज्या थेंज्याःगु राजनीतिक नेतृत्वं नं ग्वाहालि यानाच्वंगु भाषिक संस्थातय्सं छुं यायेत स्वल धाःसा उगु ज्या ताःलाइ, मखुत धाःसा किसि वल किसि वल फुस्सा धइगु उखान थें जुइगु खनेदु ।

नेपालभाषा साहित्य लागाय् बिस्कं कथंया म्हसीका ब्वलंकाः भाय् व साहित्य थेंज्याःगु छधाः प्याखं मुना, बाया वंगु लँपु, मां भाय् व मां भाय् थकायेगु लँपु थेंज्याःगु सैद्धान्तिक सफूत पिथना न्ह्यज्याःगु नेपालभाषा साहित्य आन्दोलनया इतिहासयात आः नं च्वन्ह्याका यंकेगु खःसा नेपालभाषा साहित्य तःमुँज्या थेंज्याःगु सक्षम व सवल संस्थां हे नेतृत्वदायि भूमिका म्हितेमाः ।

मखुत धाःसा छुं ई सञ्चालन जुयाः दिना वनीगु छेफ परिवार, बाल साहित्य मण्डल, झ्याम्बोलोम्बा कला समूह, राज कला केन्द्र व प्रगतिशील साहित्य सम्मेलन थें नेपालभाषा साहित्य तःमुँज्या नं इतिहासया पानाय् स्वचाः वनेमाली ।

थुकियात ध्यानय् तयाः वर्तमान आवश्यकता नेपालभाषां शुद्ध रुपं च्वयेगु, नेपालभाषाया सफू व पत्रपत्रिका पिथनेगु नापं भाषा कक्षायात नं निरन्तरता बिया वनेगु ज्यात निरन्तर याना वनेगु खत धाःसा थौं मखुसां कन्हय् ख्वपय् नेपालभाषां च्वये ब्वने सःपिं मनूत तयार जुयाः साहित्य, कला व पत्रकारिताया लागाय् अझ अप्वः योगदान बिये फइगु वातावरण झी स्थानीय नेवाः समुदाययाके दयाच्वनीगु खनेदु । थ्व खँय् नं सकसिनं ध्यान तयेमाः ।

 

सम्बन्धित बुखँ

LEAVE YOUR COMMENTS