पतन जुजुं वनाच्वंगु पूँजीवाद

पूँजीवादी राष्ट्रत थःगु हे कारणं थौं विश्वय् पतन जुजुं वनाच्वंगु स्थिति दु । सदन वा प्रतिनिधिसभा व सरकारया बेमेलया कारणं अमेरिकी राष्ट्रपति डोनाल्ड ट्रम्प हीमी चायाच्वंगु स्थिति दु । सदनं थःगु नीति कथं पःखाः दनेत बजेट मबीवं सदननापं डोनाल्ड ट्रम्प वेँय्सू चायाच्वंगु दु । अथे जुयाः थौं ह्वाइट हाउसया अवस्था तसकं हे अशान्त जुयाच्वंगु दु ।

अथेहे थःत तःधंगु पूँजीवादी राष्ट्रया दावी यानाः दक्षिण एशियाय् साम्राज्यवादी नीति कथं ज्या यानाच्वंगु प्रजातान्त्रिक देय् भारत नं गन्जागोलया स्थितिइ दु । गन गन धर्म व जातियात थकयाः वर्गीय हितयात क्वत्यलेत स्वयाच्वंगु दु, अन अन देसय् शान्तिया पलेसा गन्जागोलया स्थिति दु ।

थथे जुयाच्वंगु देय्त स्वस्वं वनेगु खःसा इटलीइ रोमया सभ्यता नष्ट याये कथं थीथी सरकारं ज्या न्ह्याकाच्वंगु स्थिति दु । उकी पाखें सयेकाः थौं नेपाल सरकारं नं स्वनिगःया सभ्यता नष्ट यायेगु स्वयाच्वंगु मखुला धइगु न्ह्यसः नं ब्वलनाच्वंगु दु । इटलीइ रोमया सभ्यता लित हयेगु निंतिं नं धर्म युद्धया अवस्था सिर्जना जुयाच्वंगु दु ।

थ्व फुक्कं पूँजीवादी कमजोरी खः । भारतय् जक मुसलमानत २५ करोडया ल्याखय् दु । छगू इलय् ला भारतयात मुस्लिम राष्ट्र घोषणा यायेमाःगु माग नं जूगु खः । तर अन हिन्दू राष्ट्र धइगु नीति अवलम्बन यानाः नां जक धर्म निरपेक्ष कायम यानातःगु दु । थौं नेपाःया स्थिति नं अथे हे खः ।

भारतय् हिन्दू लादे यानाः मेमेगु धर्मयात हेवाय् चवाय् यायेगु प्रवृत्ति दु । छगू हे धर्म माने यायेगु, छगू हे जातियात थकायेगु वा बाहुन क्षेत्रीयात जक राज याकेगु नेपाल सरकारया नीति नं भारतीय सत्तापक्षया नीति स्वयां छुं भतिचा हे पाःगु खनेमदु ।

थन धर्मनिरपेक्षता ला संविधानय् जक कायम जुयाच्वंगु दु । थनया सरकारया नीति, कार्यक्रम व व्यवहारय् छगू धर्म, छगू जाति, छगू पोशाक व छगू हे जक संस्कृतिया पक्षपाती जुयाः ज्या यानाच्वंगु कारणं ७० प्रतिशतया ल्याखय् दुपिं जनजाति आदिवासी व निम्न आय दुपिं वर्ग समाजय् न्ह्याब्लें हे लिउने लानाच्वंगु दु ।

भारतय् हिन्दू लाडे यानाः मेमेगु धर्मयात हेवाय् चवाय् यायेगु प्रवृत्ति दु । छगू हे धर्म माने यायेगु, छगू हे जातियात थकायेगु वा बाहुन क्षेत्रीयात जक राज याकेगु नेपाल सरकारया नीति नं भारतीय सत्तापक्षया नीति स्वयां छुं भतिचा हे पाःगु खनेमदु । अझ छगू जक धर्मयात मान्यता बिइमजिउ धइगु सः थ्वयेकीपिं वा फुक्कं धर्म समान जुइमाः व राज्यया थःगु धर्म दये मजिउ धइगु धर्म निरपेक्षताया पक्षपातितय्त ख्यायेगु स्वयाच्वंगु दु ।

बेलायतय् थज्याःगु कथंया पूँजीवादी व्यवस्था दुने कमी कमजोरी सुरु जूगु दु । बेलायतयात यूरोपेली संघपाखें अलग्ग तयेगु वा थः हे अलग्ग जुया वनेगु खेल सुरु जूगु दु । मेगु पूँजीवादी देय् फ्रान्सय् म्हासुगु वसः पुनीपिनिगु विरोधं सरकारया नुगलय् ख्वाउँका बियाच्वंगु दु । स्पेनया छगू टुक्रा भूभाग अलग्ग जुइगु तरखर जुयाच्वंगु दु ।

नेपाल थेंज्याःगु पूँजीवादी राष्ट्र उकिसनं पिनेपाखें निर्भर जुयाच्वंगु राष्ट्रय् ला झन जक खतरनाक स्थिति खने दयाच्वंगु दु । थौंकन्हय् नेपाःया फुक्क हे धइथें भूतपूर्व सेनापतित दिल्लीइ थ्यनाच्वंगु दु । छुं ई न्ह्यवंनिसें हे अन लानाच्वंगु दु । थ्व संयोजक जक नं मखयेफु । आः नकतिनि हे जक प्रधानसेनापति तकं दिल्लीइ वनाः लिहां वःगु स्थिति दु ।

थ्व छु खः ? प्यम्ह न्याम्ह नेपाःया भूतपूर्व सेनापतित छाय् छक्वलं हे दिल्लीइ थ्यनाच्वंगु थ्व रहश्यमय खँ मखुला ? थुकियात कुटनीतिक लागां गम्भीर रुपं स्वयाच्वंगु दु । छुं ई न्ह्यः जक दक्षिणपूर्वी एशियाय् सेनातय्गु छगू संगठन चायेकेगु व भारतय् छवाः तक उगु हे संगठनं युद्ध अभ्यास यायेगु निर्णय जूगु खः ।

भेला नेपालय् जूगु खःसां नेपालं भारतय् जूगु उगु सैनिक अभ्यासय् धाःसा ब्वति मकाः । थथे नेपाः थेंज्याःगु प्यखेर मध्ये स्वखेरय् भारतपरिवेष्ठित जुयाः म्वानाच्वंगु राष्ट्रं भारतं धाःथें हे युद्ध अभ्यासय् ब्वति काःगु खःसा आः तक उगु सैनिक संगठनया छगू ज्याकू नेपालय् च्वने धुंकल जुइ ।

विम्स्टेकया नामं नेपालय् तःन्हु तक जूगु भारतीय इशाराय् चले जुयाः अमेरिकायात ग्वाहालि याइगु अमेरिकाय् हेडक्वाटर जूगु उगु संगठनं आह्वान याः थें थः संलग्न मजुयाः भारत व नेपाःया सेनातय् दथुइ छगू कथं तिक्तता ब्वलंगु नं जुइफु । उकियात शान्त यायेगु निंतिं हे जक नं सकलें पूर्व सेनापति छक्वलं भारतया दिल्लीइ थ्यनाच्वंगु ला मखुला ?

न्हापा नं दक्षिणपूर्वी एशियाय् छगू सैनिक संगठन कायम जूगु खः । आसियान नामं दयेकूगु उगु सैनिक संगठन लिपा अन लाः थन लाः मदया वन । आः हाकनं विमस्टेकया नामं न्हूगु सैनिक संगठन खडा यानाः उकी भारतं धाःथें च्वनेगु व नेपालय् छगू क्षेत्रीय संगठन चायेकेगु धइगु ला अबलय् हे खँ पिहां वये धुंकूगु खः ।

गथे भियतनामय् संगठन दयेवं कम्बोडिया व लाओसयात तकं छुं छुं गन्जागोल यायेत न्हापा अमेरिकी साम्राज्यवाद ताःलाःगु खः, आः नेपालय् सैनिक संगठन तयाः भारतीय पक्षं दक्षिण एशियाया थीथी मुलुकय् नं थःगु पकड जमे यायेत स्वयाच्वंगु खः । उकिया लागिं माःक्वः दां व थीथी ग्वाहालि अमेरिकां बिइगु खँय् भारत नं धुक्क हे जुयाच्वंगु दु ।

कम्बोडियां थाइल्याण्ड, लाओस व भियतनाम थिउथें भारतं दक्षिण एशियाया नेपाल, पाकिस्तान, वर्मा, बंगलादेश लगायत आपालं राष्ट्रयात स्वानाच्वंगु दु । उकिं नं यदि पाकिस्तान माने मजूगु खःसा नेपालय् क्षेत्रीय हेडक्वाटर सञ्चालन यानाः भारतं आः हे क्षेत्रीय सैनिक मोर्चाया नेतृत्व यानाच्वने धुंकल जुइ ।

कम्बोडियाया सिंहनायक अमेरिकाय् च्वने चाहे जूगु इलय् अन झिंनिदँ न्ह्यःहे हिन्दू धर्म प्रचार जुइधुंकूगु सीकाः छगू छेँय् नं छम्ह भिक्षु जुइमाःगु नियम दुगु राष्ट्रयात पतनया स्थितिइ वयेका बिउगु खः । छगू इलय् फिलिपिन्सं सिंहानुकयात थःपिनि सदनय् सम्बोधन यायेत सःतल । गथे नेपालय् मोदीयात सदनय् न्ववाकेत सःतूगु खः ।

तर अमेरिका वा ह्वाइट हाउसं वःम्ह मनुखं तयार याःगु भाषणयात हुबहु जक ब्वनेगु खँ पिहां वयेवं सिंहानुकं थःगु भाषणय् कम्बोडिया स्वतन्त्र देश जूगु, सुयागुं हे अधिनय् मच्वनेगु खँ न्ववानाबिल । वयां लिपा अन मर्यादा पालंक सिंहानुकं भाषण यानाः कुहां वयेकथं हे छिगु भाषणं सभामुख लय मताल धकाः जनाउ बिया वन । लिपा तुरुन्त जुजु सिंहानुकयात चीनय् ब्वनाः उकिया स्पष्टिकरण काल । थुकथं अमेरिकां थीथी देसय् जालझेल यानाच्वंगु दु ।