सरकारया विरोधय् दम गुलि दु ?
निरीह प्रतिपक्ष जुल धकाः ओलाचना जुयाच्वंगु इलय् नेपाली कांग्रेसयात सरकारया विरोध यायेगु मुद्दा चूलाःगु दु । थ्व मौकाया भरपूर उपयोग यायेगु मानसिकताय् नेपाली कांग्रेस खनेदु । वा वइगु मौसम आन्दोलनया नितिं पाय्छि ई मखु अय्नं प्रतिपक्ष दल कांग्रेसं सतक आन्दोलनया घोषणा यात ।
थुकिं नेपाली कांग्रेसया आन्तरिक कचवं थाति लाइगु फाइदा देउवां कायेखनी मेखे प्रतिपक्ष निरीह जुल धकाः जुयाच्वंगु आलोचनापाखें मुक्त जुइगु मौका नं चूलाइ । संसदय् सत्तापक्षया दुई तिहाइनं मयाक समर्थन दु । विपक्षी नेपाली कांग्रेस देय्न्यंकं हे एक तिहाइ स्वयां म्हो उपस्थितिया कारणं वयागु अवस्था कमजोर जुयाच्वंगु खः ।
खास हे सरकारं पिने च्वने म्वाःलाच्वंगु कांग्रेस वंगु प्रदेश व संघया चुनावं यक्व लिउने लाका बीवं मेगु न्यादँ तकया निंतिं कांग्रेस प्रदेश व संघया सरकारय् दुमथ्याइगु अवस्था दु । उकिं लः बिना न्या वाथावाथा कं थें कांगे्रस नं सत्ता बिना म्वायेत अःपुगु खँ मखुत । खय्त ला वंगु दशकं निसें नेपाःया मुख्य दलत मध्ये नेकपा व कांग्रेस निगुलिं निरन्तर सत्ताया शिखरय् दु ।
सरकारय् दइबलय् देय्या नितिं खास हे उपलब्धिमूलक ज्या याये मफइगु कमजोरी दुपिं नेपाःया राजनीतिक दलत विपक्षीइ च्वनीबलय् धाःसा घमासान विरोध व आन्दोलन यायेत सफल जू । थ्व दक्वंया वावजूद देसय् स्थायी प्रकृतिया सरकार प्रदेश व संघय् दु । उकिं थुपिं सरकारतय्सं खने दइ कथं, महसुस जुइ कथं ज्या याइगु भलसा जनतां कयाच्वंगुली विवाद मदु ।
प्रविधिया विकासया कारणं संसारय् इन्टरनेट फुक्क जनताया पहुँचय् थ्यनीगु कथं पलाः ल्ह्वनेमाःथाय् इन्टरनेटया भाः अप्वइगु कथंया निर्णय नं थःगु लोकप्रियताय् ह्रास वइगु छगू मेलाः पलाः खः ।
थ्व अवस्थाय् छुं याये धकाः न्ह्यचिलाच्वंगु सरकारयात विपक्षी दलतय्सं ज्या याये मफइगु कथं वा सरकार क्वःथले मफइगु कथं मतादेश जनतां बियातःगु दु । प्रदेश सरकारया संरचना न्हूूगु जूगुलिं जनतां महसुस जुइ कथं ज्या यानाः क्यनी धकाः भलसा काये भचा हथाय् जुइ । तर संघीयतां जनतायात करया भार अप्वइ धइगु आरोप पुष्टि जुइकथं प्रदेश सरकारतय्सं धमाधम करया प्रतिशत वृद्धि मयाःसां जिउगु खः ।
प्रदेश सरकारतय्सं प्रदेशया थःगु हे बजेट हयाः गुलि ज्या याना क्यन धइगु स्वयेत दच्छि पी हे माली । तर थुकथंया सुविधा धाःसा केन्द्र सरकारयात मदु । केन्द्र सरकारं नं थःगु हे बजेट संसदं पारित यानाःन्हूगु आर्थिक दँ नं शुरु यायेधुंकल । प्रचण्ड बहुमत सहितया थ्व वामपन्थी सरकारय् संघीय समाजवादी नं दुथ्यायेधुंंकाः थ्व सरकार दुई तिहाइ बहुमत स्वयां अप्वः थ्यन ।
सरकार गठन जूगु न्याला ति ई फुइत्यंगु थ्व इलय् सरकारया विरोधय् कांग्रेसं संसदय् जक मखु सतकय् नं आन्दोलन यायेत्यंगु ई मत्यवं याःगु ज्या थें खनेदत । सरकार गठनया स्वला ति ई बांलाक हे लोकप्रिय जुल ।
सिण्डिकेट अन्त यायेगु पलाः, ज्या सिमधयेकूपिं ठेकेदारतय्त कारवाहीया पलाः, अनावश्यक रुपं यक्व ध्यबा कयाः मलेसिया वनेत बाध्य जूपिं ज्यामितय् पक्षय् बरु ज्यामि हे छ्वये मखु थः नागरिकतय्त म्वायेक दथुइ च्वंपिंत ध्यबा पुइके मबीगु सरकारया पलाः जक मखु कि प्रधानमन्त्री ओलीया भारत व चीनया सफल भ्रमण नं जनतायात महसुस जुइगु कथंया ज्या खः ।
तर सरकार संचालनया प्यला ति थ्यंबलय् निता खँय् विपक्षीतय्त विरोध यायेगु अवसर चूलात । न्हापांगु सवाल सरकारं हःगु चिकित्सा शिक्षा विधयेकया विरोधय् डा. केसीया सत्याग्रह वामपन्थी सरकारया नितिं नं पेले याये मफइगु मुद्दा कथं विकास जुल । चिकित्सा शिक्षा अध्यादेशयात प्रतिस्थापन यायेत हःगु विधयेक वामपन्थी सरकारया नितिं ल्वयेक वयेमाःथाय् सरकार भचा चुके जूगु खनेदत ।
थ्व विधयेकया विरुद्ध नेपाली कांग्रेसया विरोध स्वयां नं मेडिया व बौद्धिक ख्यः वंगु कारणं माथेमा प्रतिवदेनया विषयय् सरकारं पुनर्विचार यायेमाःगु खनेदत । गबलें गबलें थःगु शक्ति दु धकाः त्यला यंकेगु स्वयां परिस्थिति स्वयाः छपलाः लिचिलां मस्यं । ठीकठाक कथं हे न्ह्यानाच्वंगु सरकारं याये हे म्वाःगु छता निर्णय नं विपक्षीतय्त मसला बीगु ज्या जुल ।
व खः, विरोध प्रदर्शनया नितिं निश्चित थाय् क्वःछिनाः न्हापा प्रदर्शन जुइगु थाय्यात निषेधित क्षेत्र घोषणा यायेगु । सरकारं आःथत्थें यायेम्वाःगु थ्व अनावश्यक निर्णयं सरकारया लोकप्रियताय् हे ब्रेक तया बिल । माइतिघर मण्डला लगायत गुगु थासय् प्रदर्शन याये दइ मखु धकाः निर्णय यात खास धायेगु खःसा सरकारया विरोधय् खास छुं हे शक्तिं प्रदर्शन याये फइगु अवस्था मदुबलय् म्वाःसां म्वाःसां याःगु निर्णयया कारणं वामपन्थीत लोकतन्त्र विरोधी धइगु द्वपं घाका बिल ।
सरकारया थ्व निर्णययात अदालतं कार्यान्वयन मयायेत बिउगु आदेशं ला लोकप्रिय ज्यात झन् लिउने लाका बिल । उकिं थ्व निर्णययात नं सरकारं आःयात स्थगित धया बियां इज्जत म्हो जुइ मखु । सरकारया मेगु छगू निर्णय विरुद्ध थौकन्हय् अदालतं धमाधम आदेश बियाच्वंगु दु । व धइगु चुनावया मिति घोषणा जुइधुंकाः देउवा सरकारं याःगु राजनीतिक नियुक्ति बदर यायेगु धकाः सरकारया निर्णययात आः अदालतं हाथ्या बियाच्वंगु दु ।
थुकियात करेक्सन यायेत छुं कानूनत सुधार यायेमाःगु खनेदत । मखु धइगु खःसा दुई तिहाइया सरकार दुसां थःगु इच्छाकथं ज्या याये मफइगु जुल । न्यायालयय् जुइगु भ्रष्टाचार व न्यायमूर्तितय्गु गलत निर्णययात सचेत याये फइगु संरचना नं आवश्यक दु धइगु थ्व दथुइ क्यन ।
करोडौं तक ठगे याःपिं म्यानपावर एजेन्सीया हाकिमतय् विरुद्ध सरकारं याःगु कारवाहीयात अदालतं गुकथं नोमिनल धरौटीइ त्वःतूगु घटनां कानूनमन्त्री नं न्यायपरिषदं छानबीन यायेगु गुगु घोषणा कथं छानवीनया प्रक्रिया याकनं हे न्ह्याके मफुत धाःसा न्यायालय भ्रष्टाचारया अखडा हे जुयाच्वनी ।
समाजवादय् विश्वास याइगु वामपन्थी सरकारया छुं छुं निर्णयया कारणं मूल्य वृद्धिया नितिं ग्वहालि जू वनाच्वंगु दु । प्रविधिया विकासया कारणं संसारय् इन्टरनेट फुक्क जनताया पहुँचय् थ्यनीगु कथं पलाः ल्ह्वनेमाःथाय् इन्टरनेटया भाः अप्वइगु कथंया निर्णय नं थःगु लोकप्रियताय् ह्रास वइगु खँ नं वाःचायेकेमाःगु अवस्था दु ।
आःयापलाःधइगु महसूस जुइगु कथं खने दइगु कथंया ज्या यायेगु ई खः । थः हे विवादय् लाइगु निर्णय याये न्ह्यः सक्षम व जनताया भावनायात घात मजुइगु कथं पलाः ल्ह्वनेत सल्लाह बीपिं सल्लाहकारतय्गु टीम संघया सरकारंनिसें स्थानीय तहया निर्वाचित पदाधिकारीतय्त माःगु खनेदत ।
LEAVE YOUR COMMENTS