संसद स्थगनं सत्तारुढ सांसदत हे असन्तुष्ट
येँ – संघीय संसदया बैठक सोमवाः आकाझाकां छवाः निंतिं स्थगित याःगु दु । संसदया महासचिव मनोहरप्रसाद भट्टराईनं संसदय् छगू सुचं तिकुसें खुसिबाः व चलखं पीडितपिंत ग्वाहालि, समन्वय व अनुगमन यायेगु निंतिं सांसदत जिल्लाय् वनेमाःगुलिं बैठक स्थगित यायेमाःगु खँ धाःगु दु ।
मेखे प्रतिपक्षी नेपाली कांग्रेसं धाःसा थःपिंसं संसद्य् दर्ता यानागु खुसिबाः व चलः सम्बन्धी सार्वजनिक महत्वया विषयय् सरकारं सामना याये चाहे मजुयाः संसद स्थगित याःगु द्वपं बिउगु दु । नेपाली कांग्रेसया प्रमुख सचेतक बालकृष्ण खाणं छगू वक्तव्य पितबिसें पीडितपिनि उद्धारया खँय् प्रतिपक्षी दर्ता याःगु विषयया सामना यायेत सरकार चाहे मजूगु धासें सरकारया थ्व असंवेदनशील, असहिष्णु व अनुत्तरदायी ज्या प्रति खेद प्वंका धाःगु दु ।
प्रमुख सचेतक खाणं थःपिंसं संसदय् मेमेगु विषययात कार्यसुचीं चिइकाः खुसिबाः व चलखं वःगु समस्याया बारे सहलह यायेत संसदया बैठक सुचारु यायेत थःपिं सहमत जुयागु खःसां आकाझाकां संसद स्थगित याःगु खँ धयादीगु दु । कांग्रेस नेता मीनेन्द्र रिजालं सभामुखं गृहमन्त्रीपाखें लिसः बिइकेगु ज्याझ्वः तयेगु जानकारी बिउगु, तर थःपिंत हे जानकारी मबिसें संसद स्थगित याःगु द्वपं बियादिल ।
मेखे नेकपाया प्रमुख सचेतक देव गुरुङं धाःसा कांग्रेसं थःपिनि प्रस्तावय् निं न्हापां सहलह यायेमाःगु अडान काःगुलिं समस्या वःगु खँ धयादीगु दु । गृहमन्त्रीं न्हापां संसदय् जानकारी बीगु धाःसां विपक्षीं न्हापां थःपिनि प्रस्ताव निं तयेके बीमाः धाःगुलिं समस्या वःगु खँ गुरुङं धयादीगु दु ।
सभामुखं संसद स्थगित याःगु खँ प्रतिपक्षयात जक जानकारी मदुगु मखुकि सत्तापक्षया सांसदतय्त तकं जानकारी मदुगु खः । सोमवाःया बैठकय् ब्वति कायेत सत्तारुढ नेकपाया नेता माधव नेपाल संसद भवनय् थ्यनेधुंकूगु खः । वय्कलं थःत संसद स्थगित जूगु जानकारी मदुगुलिं बैठकय् वयागु खँ धयादीगु दु ।
सत्तारुढ दलया हे मेम्ह सांसद योगेश भट्टराईनं आकाझाकां बैठक स्थगित याःगु खँय् असन्तुष्टि प्वंकूगु दु । ‘न्यय्म्हं मल्याक मनूत सीगु राष्ट्रिय विषदया इलय् सहलह मयासे संसद स्थगित यायेमजिउ’ वय्कलं धयादीगु दु ।
वय्कलं तराईलय् डुबान मजुइकेगु निंतिं भारतलिसे खँ ल्हायेमाःगु सम्बन्धय् सरकारया ध्यानाकर्षण यायेमाःगु इलय् संसद बन्द यानाः जनताया ध्यान मेथाय् पाखे छ्वःगु खँ धयादीगु दु । तर वय्कलं नं संसद स्थगित जूगुया कारणं प्रतिपक्षी कांग्रेस हे जूगु द्वपं नं बियादीगु दु ।
LEAVE YOUR COMMENTS