‘ज्यापु समाजयात सरकारया ग्वाहालि निरन्तर दइ’

येँ(नेपालभाषा टाइम्स)- प्रधानमन्त्री शेरबहादुर देउवां ज्यापु समाजया विकास व उन्नतिया लागिं राज्यपाखें बिया वयाच्वंगु ग्वाहालि निरन्तरता जुइ धयादीगु दु । ज्यापु संस्कृति विकास कोषया ग्वसालय् म्हिगः बसन्तपुली जूगु ज्यापु दिवसया समारोहय् न्ववासें वय्कलं उगु खँ धयादीगु खः ।

छुं ई न्ह्यवंनिसें ज्यापु संस्कृति विकास कोषया लागिं सरकारं फ्यानातःगु दां रोके जुयाच्वंगु खँ ग्वसाः खलकं मू पाहां प्रधानमन्त्री देउवायात अवगत याकूगु खः । उकिया लिसः बीगु झ्वलय् वय्कलं रोके जूगु खँ थम्हं मसिउगु तर उगु रोके जूगु दां गुकथं निकासा यायेगु खः उकी पहल याये धकाः आश्वासन बियादिल ।

वय्कलं थीथी ज्यापु न्ह्यलुवातय्त दां सहित हनेज्या यानादीगु खः । ज्याझ्वलय् ज्यापु विकास व नेवाः ख्यलय् योगदान यानादीपिं थीथी व्यक्तिपिं लिसें भारतया सिक्किम, दार्जिलिंग व आसामया नेवाः व्यक्तित्वतय्त समेत हनेगु ज्या जूगु खः । ज्याझ्वलय् पुलांम्ह उपप्रधानमन्त्री लिसें नेपाली कांग्रेसया सांसद प्रकाशमान सिंहं ज्यापु संस्कृति विकास कोषं यानाच्वंगु कुतः तसकं च्वछायेबहः जूगु कनादिसें समाज विकासय् ज्यापु समाजं यानाच्वंगु ज्यायात निरन्तरता बीत यानाच्वंगु ज्याय् थम्हं नं
ग्वाहालि यायेगु कनादिल ।

संस्कृति, पर्यटन तथा नागरिक उड्यननमन्त्री जीवनराम श्रेष्ठं सांस्कृतिक रुपं च्वन्ह्याःपिं ज्यापु जातिं हे देय् संस्कृतिमय जुयाच्वंगु खँ कनादिल । येँ महानगरपालिकाया उपमयेयर सुनिता डंगोलं यःमरि थें थःगु जीवन सकसियां ययेकाः जुइ फयेमाः धकाः ज्यापु दिवसया लसताय् भिन्तुना बियादिल ।

ज्याझ्वः सुरु जुइ न्ह्यः ज्यापु जातिया धुन्या, धिमे बाजं सहितया ¥यालीं देय् चाःहिउगु खः । १९ क्वःगु ज्यापु दिवस कथं न्ह्याकूगु मू समारोह ज्यापु संस्कृति विकास कोषया अध्यक्ष मंगलकृष्ण सिंया सभापतित्वय् जूगु खः ।