पुलांगु बसपार्कया अवस्था दयनीय

येँ – येँया पुलांगु बसपार्कया अवस्था तसकं दयनीय जूगु दु । बर्खाया इलय् वा वलकि तसकं ध्याचः जुइगु व चिकुलाया इलय् तसकं धू ब्वइगु जूगु दु । उकिं यानाः बसपार्कय् दुहां वनेत तकं तसकं समस्या जुयाच्वंगु दु । स्वनिगःया दक्वं थासय् व पिनेया छुं छुं जिल्लाय् तकं वनेत सार्वजनिक सवारी साधन तयेगु व्यवस्था यानातःगु पुलांगु बसपार्क दयनीय अवस्थाय् थ्यंगु खः । थनया खुल्लामंच न्ह्यःने च्वंगु उगु बसपार्क न्हापा अद्वैत मार्ग वनेगु थासय् दुगु खःसा लिपा अन येँ महानगरपालिकां २१ तल्लाया ‘काठमाडौं भ्यू टावर’ निर्माण याइगु जुइवं खुल्लामंच न्ह्यःने तये हःगु खः । उगु थासय् बसपार्क तयेगु निंतिं अन कालोपत्रे तकं यायेगु ज्या जूसां गुलिखे थासय् धाःसा कालोपत्र ब्वला वयाच्वंगु जक मखसे फोहर नं उतिकं जुयाच्वंगु दु । अथे हे वा वइगु इलय् खुल्लामंच न्ह्यःने लः मुन धाःसा अन तसकं नवयेगु नं यानाच्वंगु दु । विद्युत प्राधिकरण न्ह्यःनेपाखे व वलकि लः मुनीगु व अनं दुर्गन्ध न्यनेगु यानाच्वंगु दु । बसपर्क व्यवस्थपनया निंतिं सरोकारवाला निकायं खास हे ध्यान बियाच्वंगु खनेमदु ।