प्रदेश १ य् सरकार विरुद्ध एमालेया रिट

येँ (नेपालभाषा टाइम्स)- प्रदेश नम्बर १ य् न्हूगु सरकार नीस्वंगु प्रक्रिया असंवैधानिक जूगु धासें एमालें सर्वोच्च अदालतय् रिट तःगु दु । सभामुखया हस्ताक्षर सहित सरकार दयेकेत बहुमत खाकेगु ज्या याःगु धासें थुगु ज्या असंवैधानिक जूगु दावी यासें रिट तःगु खः ।

एमालें सर्वोच्च अदालतय् दायर याःगु निवेदनय् संविधानया धारा १६८ (२) पाखें नीस्वंगु सरकार असंवैधानिक जूगुलिं उत्प्रेरणया आदेशं बदर यानाः धारा १६८ (३) कथं न्हूगु सरकार नीस्वनेगु लँपु चायेकेत परमादेश नं जारी यायेत माग याःगु दु । वहे माग दावी यासें आः राप्रपां नं रिट दायर यायेगु तयारी यानाच्वंगु दु ।

थ्वहे झ्वलय् प्रदेश १ या न्हूम्ह मुख्यमन्त्री उद्धव थापां म्हिगः शपथ ग्रहण यानादीगु दु । मुख्यमन्त्री थापायात प्रदेश प्रमुख परशुराम खापुङं पद तथा गोपनीयताया शपथ ग्रहण याकूगु खः ।

उकथं हे मुख्यमन्त्री थापां म्हिगः हे मन्त्रिपरिषद नं नीस्वनादीगु दु । म्हिगः न्हापांगु चरणय् वय्कलं एकीकृत समाजवादीया कमल जबेगु व नेपाली कांग्रेसया प्रदीप सुनुवारयात मन्त्री नियुक्त यानादीगु खःसा म्हिगः हे शपथ ग्रहण नं याकादीगु खः ।

थ्वहे झ्वलय् थःगु हस्ताक्षरया कारणं न्हूगु गठन जूगु सरकारयात संकट वइगु खने दयेवं प्रदेश १ (कोश) या सभामुख बाबुराम गौतमं राजीनामा बियादीगु सम्भावना दुगु खँ धाःगु दु । वय्कलं प्रदेशय् सरकार गठनया ज्याय् समस्या मवयेमा धकाः हस्ताक्षर यानागु खः धासें यदि थुकी विवाद पिहां वइगु खःसा राजीनामा बीगु जुइ धयादीगु दु । फयांफछि थुकी थःपिंसं हस्ताक्षर यायेम्वाःसा जिउ धइगु इच्छा दुगु खँ नं धयादीगु दु ।

सम्बन्धित बुखँ

LEAVE YOUR COMMENTS