मलेसियायात क्लिन स्वीप

येँ – ब्याट्सम्यानतय्सं विस्फोट ब्याटिङ्ग यायेवं नेपालं मलेसियायात टि–ट्वान्टीया निगूगु कासाय् ६ रनं बुकूगु दु । थुकिया लिसें नेपालं टि ट्वान्टी विश्वकपया एसिया छनोटया निंतिं मलेसियाया लिसे म्हितूगु निगुलिं कासाय् विजय चूलाकूगु दु ।म्हिगः मलेसियाया किन्रारा मैदानय् जूगु कासाय् नेपालं न्हापां ब्याटिङ्ग यासें १७३ रनया लक्ष्य बिउगु खः, तर मलेसिया १६७ रन दयेकेत ताःलात ।

थ्व विजय लिसें नेपालं मलेसियालिसे म्हितूगु टि–ट्वान्टी शृङ्खलाय् क्लीन स्वीप यासें इतिहास नं दयेकूगु दु । नेपालं न्हापांगु कासा न्हय्गू विकेटं त्याकूगु खः । एकदिवसीय राष्ट्रया मान्यता वयेधुंकाः नेपालं न्हापांगु टि–ट्वान्टी शृङ्खला युएइविरुद्ध म्हितूगु खःसा थ्व शृङ्खला नेपालं २–१या ल्याखं त्याकूगु खः ।

म्हिगःया कासाय् नेपाःया निंतिं विनोद भण्डारी, शरद भेषावकर व पारस खड्कां विस्फोट ब्याटिङ्ग याःगु खः । नेपाःया निंतिं भण्डारीं २५ बलय् अविजित ५१ रन दयेकेगु झ्वलय् न्यागू छक्का व स्वंगू चौका थ्वात । अथेहे न्हापांगु कासाय् अविजित ८६ रन दयेकूम्ह कप्तान खड्कां छक्का व चौका निगू निगू थ्वानाः २३ रन दयेकलसा शरद भेषावकरणं निगू छक्का व प्यंगू चौका सहित ४० रन दयेकल ।

अथेहे पवन सर्राफं १०, राहित पौडेलं १९, करण केसीं १६ व ज्ञानेन्द्र मल्लं ७ रन दयेकूगु खः ।लिसलय् ब्याटिङ्ग याःवःगु मलेसियाया ब्याट्सम्यानतय्सं नं आक्रामक ब्याटिङ्ग याःगु खः ।

प्रारम्भिक ब्याट्सम्यान सैयद अजिज व विरेन्द्रिप सिंहं न्हापांगु विकेटया निंतिं ७५ रनया साझेदारी याःगु खः । नेपाःया निंतिं सन्दीप लामिछाने व सोमपाल कामीं निगू निगू विकेट काल । नेपाःया कासामिपिंसं खुसिबालं सीपिं नेपाःमितय्त श्रद्धाञ्जली प्वंकुसें हाकुगु पत्ति चिनाः म्हिगःया कासा म्हितूगु खः ।

सम्बन्धित बुखँ

LEAVE YOUR COMMENTS