कन्हय्निसें न्यय्गू शहरय् टेलिकमया फोजी सेवा

येँ –  नेपालय् टेलिकमं कन्हय् बुधवाःनिसें देय्या न्यय्गू शहरय् फोरजी सेवा सुरु याइगु जूगु दु । निजी टेलिकम सेवा एनसेलं देन्यंकं फोरजी सेवा बिया वयाच्वंगु इलय् सरकारी कम्पनी टेलिकमं धाःसा नकतिनि न्यय्गू शहरय् थ्व सेवा न्ह्याकेत्यंगु खः । नेपाल टेलिकमं वंगु २०७३ पुसं हे येँ व पोखराय् फोरजी सेवा बिउगु खःसां मेमेगु शहरय् धाःसा नकतिनि थ्व सेवा थ्यंकूगु खः ।

टेलिकमं आः नं अप्वः जनघनत्व दुगु शहर ल्ययाः जक न्यय्गू शहरय् थ्व सेवा विस्तार याःगु खः । फोरजी सेवा विस्तारया निंतिं टेलिकमं थ्व न्यय्गू शहरय् १५० गू बिटिएस टावर जडान याःगु दु ।

टेलिकमया प्रवक्ता प्रतिमा वैद्ययया कथं चन्द्रगढी, विर्तामोड, दमक, विराटनगर, इनरुवा, धरान, धनकुटा, जनकपुर, जलेश्वर, बारा, पर्सा, सिमरा, कलैया, गोर, धादिङ, काभ्रेपलाञ्चोक, सिन्धुपाल्चोक, विदुर, मन्थली, भिमेश्वर, सिन्धुलीमाडी, पर्वत, कुश्मा, बाग्लुङ, चितवन, सौराहा, तौलिहवा, बुटवल, देवदहय् थ्व सेवा विस्तार जुइ । अथेहे तुलसीपुर, घोराही, नेपालगन्ज, कोहलपुर, भीमदत्तनगर, झलारी, पिपलाडी, चौमला, अत्तरीयाया नं थ्व सेवा थ्यनी ।

कर्णाली प्रदेशया सुर्खेतय्नं बुधवाः निसें हे फोरजी सेवा संचालन जुइगु खँ धाःगु दु । टेलिकमं आःयात न्यय्गू शहरय् जक विस्तार यायेत्यंसां फोरजी सेवा वइगु माघ दुने देन्यंकं विस्तार यायेगु लक्ष्य तयातःगु दु । फोरजी सेवा देय्न्यंकं विस्तार यायेगु निंतिं टेलिकमं १८ अर्बया खर्च याःगु दु ।

थुकिया निंतिं कम्पनी चिनियाँ कम्पनी जेडटीइ कर्पोरेशन व हङकङया सीसीएसआई कम्पनीलिसे सम्झौता याःगु खः । वंगु माघय् याःगु थ्व सम्झौता कथं वइगु माघ दुने देन्यंकं फोरजी सेवा बीगु जुइ । सम्झौता कथं आः प्यलाया दुने ज्या सिधयेकेमाःगु दु । ठेक्का काःगु कम्पनीतय्सं प्यलाया दुने जडान ज्या पूवनीगु खँ धाःगु दु ।

टेलिकमं फोरजी सेवा विस्तार यानाः थप ६५ लाख ग्राहक हयेगु योजना दयेकाच्वंगु दु । थौंकन्हय् टेलिकमयाके २ करोड २६ लाख ९६ हजार ग्राहक दु । थुकी मोबाइल संचालन याइपिं जक निगू करोड दुगु खँ नेपाल दुरसञ्चार प्राधिकरणं धाःगु दु । टेलिकमं मोहनिया झ्वलय् लाकाः आइतवाः निसें हे फोरजी मेमेगु सेवाय् विशेष छुट नं बिउगु दु ।

आः टेलिकमया फोरजी सीम हिलेत छुं नं शुल्क मकाइगुजूगु दु । अथेहे न्हापांखुसी फोरजी नेटवर्कय् दुहां वःम्ह ग्राहकयात निन्हुया निंतिं २ सय एमबी डाटा निःशुल्क बोनस नं बीगु जूगु दु । टुजी व थ्रीजी सिम चले यानाच्वंपिं ग्राहकतय्सं नं फोरजी सिम कयाः अःपुक चले यायेफइगु खँ टेलिकमं धाःगु दु ।

सम्बन्धित बुखँ

LEAVE YOUR COMMENTS