‘२०२० या आज्जु पूमवंसां नं सरकारयात छुं मपाइगु’

येँ – संस्कृति, पर्यटन तथा नागरिक उड्डयन मन्त्री योगेश भट्टराईं सरकारं घोषणा याःगु भ्रमण वर्ष २०२० या आज्जु पूमवंसां नं सरकारया छुं मपाइगु टिप्पणी यानादीगु दु। मन्त्री जुइधुंकाः न्हापांखुसी पोखराय् वंम्ह पर्यटन मन्त्री पर्यटन व्यवसायीलिसे सहलह यायेगु झ्वलय् उगु खँ धयादीगु खः ।

वय्कलं सरकारं घोषणा याःगु पर्यटन दँ व २० लाख पर्यटन दुकायेगु आज्जुयात पर्यटन व्यवसायी हे असम्भव धकाः अभिव्यक्ति मबीत नं वय्कलं इनाप यानादिल । वय्कलं सरकारं आज्जु तःकथं पर्यटक वइमखु धकाः हिरो व नेता जुइमखु धयादिल । पर्यटन व्यवसाययात हे नकारात्मक टिप्पणी यायेबलय् पर्यटन क्षेत्र निरुत्साहित जुइगु व सरकारया मखुसें व्यवसायी हे जाकेँया समस्या जुइगु तर्क नं वय्कलं तयादिल । वय्कलं धयादी, ‘छिकपिं पर्यटन व्यवसायी जुयादी । अले थःपिंत हे डिस्करेज यायेगु ला ? २० लाख पर्यटन सरकारया जाकेँ चले जुइ निं, छिकपिनि जक चले जुइमखु, अले थःगु जाकेँ बन्द जूगु स्टेटमेन्ट बीगु ला ?’

२० लाख पर्यटन दुकायेगु लक्ष्यय् थ्व स्वयां न्ह्यः वयाच्वंपिं १२-१५ लाख पर्यटकय् ५ लाख जक थप जुइगु जूगुलिं तःधंगु खँ मखु मन्त्री धापू दु। सहलहया झ्वलय् वय्कलं पर्यटन व्यवसायीयात देय्या दुर्दशाया ब्याख्या मयायेत नं सुझाव बियादिल । मेगु देय्या पर्यटकयात झीगु देया दुर्दशाया व्याख्या छाये यायेगु धकाः न्ह्यसः तयादिसें छुं कमि दुसा भिंकेगु खँ कनादिल ।