फुटपाथय् अटेरी जुयाः तयातःगु पसः चिइकेगु सुरु

येँ– फुटपाथय् पसः मतयेत इनाप याःसां जबर्जस्ति पसः तयाच्वंपिनिगु सामान ज्वनायंकेगु ज्या सुरु जूगु दु । थौं सुथय् जागरुक युवा समूहं असं निसें परोपकार ताँ तक चाःहिलाः फुटपाथय् पसः तयाच्वंपिंत चिइकेगु सुरु याःगु खः ।

कोभिड १९या संक्रमण पाखें बचे जुइगु निंतिं पसः तकं चायेके मबियाच्वंगु अवस्थाय् फुटपाथ पसःया बिगबिगी जुयाच्वंगु धासें थज्याःगु पसः चिइकेगु सुरु याःगु खः । हूलहूल जुइक हे पसः तयाच्वनेवं कोरोना संक्रमणया खतरा अप्वया वःगु धासें स्थानीय ल्याय्म्हत हे जागरुक जुयाः पसः चिइकेगु ज्या न्ह्याकूगु खः । थुकिया निंतिं निन्हु न्ह्यव जक स्टार क्लबया नायः चन्द्रकुमार महर्जनया संयोजकत्वय् जागरुक युवा समूह नांया छगू पुचः नं नीस्वंगु खः ।

थ्व पुचलं न्हिन्हि धयाथें बैठक च्वनाः फुटपाथ पसः चिइकेगु अभियानयात न्ह्याका यंकाच्वंगु खः । थ्व झ्वलय् निन्हु तक फुटपाथ पसः तइगु लागा चाःहिलाः पसः मतयेत इनाप याःगु खःसा थनिंनिसें अटेरी जुयाः तयातःगु पसः उठे यायेगु ज्या न्ह्याकूगु खः ।

थौं सुथय् ६ बजे असनं मुनाः पसः चिइकेगु ज्या न्ह्याकूगु खः । अटेरी जुयाः तयातःगु पसः ल्ह्वना महानगरप्रहरीया गाडीइ तयाछ्वःगु खः । थ्व अभियानय् स्थानीय संघसंस्था, जनप्रतिनिधि, नगर प्रहरी, प्रहरी, स्थानीयवासीपिंसं ग्वाहालि याना वयाच्वंगु दु ।