साझाया ‘ई टिकेटिङ’प्रति आकर्षण अप्वयाच्वन

येँ – साझा यातायातं यात्रुतय् सहजता व सुविधाया निंतिं शुरु याःगु विद्युतीय कार्डया विक्री न्यासः थ्यनेधुंकूगु जानकारी बिउगु दु । साझां यात्रुतय्त सुविधा बीगु उद्देश्यं शुरु याःगु थुगु सेवाप्रति यात्रुतय् आकर्षण अप्वयाच्वंगु नं धाःगु दु । साझाया व्यवस्थापक महेन्द्रराज पाण्डेयं नियमित रुपं साझा यातायातया बस सेवा काइपिं यात्रुतय् लक्षित यानाः उगु सेवा न्ह्याकागु जानकारी बियादीगु दु ।

लिसें वय्कलं संस्थां आः साझापाखें संचालन जुयाच्वंगु दक्वं बसय् ‘ई–टिकेटिङ’या सेवा नं लागू यायेधुंगु जानकारी बियादिल । नियमित रुपं साझाया बस प्रयोग याइपिं कर्मचारी, विद्यार्थीलिसें सर्वसाधारणत थुगु सेवां गाक्कं सुविधा बियाच्वंगु वय्कलं धयादिल ।

साझाया उगु कार्ड बसया सहचालकलिसें पूच्वय् च्वंगु साझाया ज्याकूपाखें उगु कार्ड काये फइगु व निसः तका वंगु कार्ड काल धाःसा उलि हे ध्यबा बराबरया सेवा काये फइगु साझां न्ह्यथंगु दु ।

थुगु सेवा प्रयोग यायेबलय् सहचालकयात ध्यबा बीत नं थाकु मजुइगु व अप्वः ध्यबा नं पुले म्वाःलीगु जूगुलिं थुकथंया सेवा संचालनय् हयागु साझां जानकारी बिउगु दु । साझां थौंकन्हय् स्वनिगः दुने व स्वनिगलं पिने यानाः १७ गः बसपाखें सेवा बिया वयाच्वंगु दु ।