ख्वपया तलेजु व चाँगुनारायणय् मतया लाइन चानाबिल

ख्वप(नेपालभाषा टाइम्स)- नेपाल विद्युत प्राधिकरणं ख्वपया तलेजु व चाँगुनारायण द्यःयाथाय् मतया लाइन चाना बिउगु दु । प्राधिकरणं झण्डै निगू दशक न्ह्यवनिसें विद्युतया महसुल मपूगु धासें मतया लाइन चाना बिउगु खः ।

नेपाल विद्युत प्राधिकरण ख्वप वितरण केन्द्रयाकथं ख्वपया तलेजु द्यःया २३ गू लख झिंच्याद्वः व चाँगुनारायणद्यःया देगलय् च्याकूगु मतया ३५ गू लख ख्वीगुद्वः विद्युत महसुल बक्यौता ल्यं दनि । केन्द्रया प्रमुख रामप्रमोद शाहया कथं ०६० निसें तलेजु द्यःया देगलय् च्याकूगु मतया महसुल ल्यं दनिसा चाँगुनारायण द्यःयाथाय् नं ०६३ सालनिसेंया बक्यौता ल्यं दनि ।

थुपिं निगुलिं देवस्थलय् मेमेगु थासय् स्वयां म्हो दरं विद्युत आपुर्ति याना वयाच्वनागु जूसां विद्युतया आपूर्ति आपालं मात्राय् जुयाच्वंगु व झण्डै निगू दशकनिसें महसुल मपूगुलिं तःधंगु मात्राय् बक्यौता ल्यं दुगु प्रमुख शाहं धयादीगु दु ।

मतया लाइन चाये न्ह्यः देगलय् च्याकूगु मतया स्वामित्व कायेत इनाप यासें स्थानीय सरकार, स्थानीय प्रशासन, गुथि संस्थान ख्वपलिसें पुरातत्व विभागय् तकं तःक्वःमछिं पहल यानागु खःसां खास हे सुनुवाई धाःसा मजूगु वय्कलं कनादीगु दु । गुगुं नं निकायं स्वामित्व कायेत तयार मजुइवं अन्तत थःपिं बाध्य जुयाः मतया लाइन चायेत बाध्य जूगु वय्कलं धयादिल ।