तौदहय् लःया फोहरा तयेगु योजनाया स्थानीयपाखें विरोध

येँ – किपू नगरपालिका वडा नं. ६ लय् लाःगु ऐतिहासिक व धार्मिक महत्वं जाःगु तौदहया पहिचान न्हना वनीगु अवस्थाय् थ्यंगु धासें स्थानीयवासीं चिउताः क्यनाहःगु दु । किपू नगरपालिकां तौदहय् लःया फोहरा (वाटर फाउन्टेन) तयेगु तयारी याःगु खःसा उकिं तौदहया संस्कृति, नापं पहिचान नं न्हना वनीगु आशंका यासें स्थानीयवासी विरोधय् कुहां वःगु खः ।

नगरपालिकां तौदहय् वाटर फाउन्टेन निर्माणया निंतिं वडास्तरीय योजना अन्तर्गत चालु आर्थिक दँय् ३७ गू लाख न्यय्द्वः तका दां विनियोजन याःगु खः । धार्मिक व ऐतिहासिक महत्वं जाःगु थासय् लःया फोहरा निर्माण यायेबलय् उकिं पुखूया संस्कृति न्हना वनीगु धासें स्थानीयतयसं विरोध यायेवं चालु आर्थिक दँया शुरुइ योजना कार्यान्वयन यायेगु ज्या दिउगु खः ।

स्थानीयतय्सं ऐतिहासिक, धार्मिक, पुरातात्विक, पौराणिक दृष्टिं महत्वं जाःगु पुखुलिइ चांचां हे वाटर फाउन्टेन निर्माण यायेगु ज्या जुयाच्वंगु स्थानीयतय् दावी दु । नगरपालिकां थःगु वेबसाइटय् निर्माण योजनाया निंतिं स्वक्वःतक प्रस्ताव आह्वान याःगु खःसा उकी छगू नै बोलपत्र दुहां मवयेवं थम्हं चाहना याःपिंपाखें उगु ज्या न्ह्याकेत स्वःगु स्थानीवासीया द्वपं दु ।

पुरातात्विक व धार्मिक महत्वया पुखुया अस्तित्व न्हंकेगु ल्याखं उकथंया योजन हःगु धासें विरोधय् कुहां वयाच्वंपिं मध्ये स्थानीयवासी विनोद बस्नेतं विना अध्ययन फोहरा दयेकेगु योजना हःगु दावी यानादी । वातावरण संरक्षण नियमावली २०५४या अनुसूची १ य् न्या वा मेपिं जलचर दुगु गुगुं नं खुसि, ताल वा पुखुलिइ इन्जिन जडान यानातःगु उपकरण व इन्धन प्रज्वलन यानाः जल यात्रा संचालन यायेगु प्रस्तावया निंतिं प्रारम्भिक वातावरणीय परीक्षण यायेमाःगु खँ न्ह्यथनातःगु दु ।

सम्पदा न्हंकेत्यंगु धासें उकिया विरुद्ध स्थानीयवासी संरक्षण समिति हे गठन यानाः थुगु योजना विरुद्धया अभियानय् लगे जुयाच्वंगु दु । किपू नगरपालिकां तौदहय् निर्माण यायेत्यंगु संरचना प्राचीन स्मारक संरक्षण ऐन २०१३, जलचर संरक्षण ऐन २०१७, प्राचीन स्मारक संरक्षण नियमावली २०४६, वातावरण संरक्षण नियमावली २०५४ व राष्ट्रिय सिमसार नीति २०६९ विरुद्ध जूगु तौदह संरक्षण समितिं न्ह्यथंगु दु ।

समितिया उपेन्द्र नेपालं फोहरा निर्माणं स्थानीय आदिवासी जनजातिया कला, संस्कृति, धर्म, संस्कार, पुरातात्विक महत्व लोप जुइगु दावी यानादी । थ्व सम्बन्धय् पुरातात्विक सम्पदाय् क्षति जुइकथं यायेत्यंगु निर्माण पनेत धासें वंगु बुधवाः नगरप्रमुख रमेश महर्जनयात निवेदन बियागु तर, उकियात दर्ता हे मयाःगु स्थानीयवासीया धापू दु ।उखे नगर प्रमुख महर्जनं वडाअध्यक्ष लगायत सरोकारावालालिसे जूगु सल्लाहकथं हे थम्हं निवेदन दर्ता मयानागु धयादिल ।

सम्बन्धित बुखँ

LEAVE YOUR COMMENTS