गुलाब स्वानय् नं दु, वासःया गुण

गुलाब छक्वः पित कि तःदँ तक म्वानाच्वनी । कँझालय् ह्वइगु बांलाःगु व नस्वाःगु स्वां खः – गुलाब ।आयुर्वेदय् गुलाबयात महाकुमारी, शतपत्री व तरुणी नं धयातःगु दु । तुयूगु गुलाबयात संस्कृतं सेवती नं धाः । गुलाब १७निसें ७० अक्षांश तकया भूगोलया उत्तराद्र्धय् न्ह्याथासं हे दु । सछिता स्वांया अप्वः जातयागु दुगु थ्व स्वांया अप्वः यानाः एसियाली प्रजातियागु हे खःसां छुं छुं जातीया मूल प्रदेश युरोप, उत्तर अमेरिका व उत्तरी पश्चिमी अफ्रिका खः ।

नेपालय् जंगली जातयागु तुयुगु म्हासुगु व गुलाबी रंगयागु स्वांमा यक्व हे दु । गुलाब स्वां अप्क थें कलमी कयाः हे पीगु खः । अप्वः थें खचरा जाति ‘कटिङ व ग्राफ्टिङ’ यानाः पिकाइगु खः । गुलाब स्वानय् ९५ प्रतिशत लः दइ । गुलाब स्वांयात कोमलता व सुन्दरताया प्रतीक नालातःगु दु । तर थ्व बांलाःगु स्वां जक मखु, थुकी गुलिखे ल्वय्यात जिउगु वासःया गुण नं दु ।

# गुलाबया स्वांहः नयेगु यानाच्वन धाःसा वा व गिजा नितां बल्लाइ । म्हुतु नवःगु लनावनी, अले पायरिया (वां हि वइगु) ल्वय्पाखें मुक्त जुइ ।

# गुलाबय् भिटामिन सी यक्व हे दु । गुलकन्द (गुलाब स्वांयागु छताजि वासः) न्हिं न्हिं नयाच्वन धाःसा क्वें बल्लाइ । न्हिं छफ्वः गुलाब स्वां नयाच्वन धाःसा टिबीया ल्वगियात याकनं हे याउँयावइ ।

# गुलाबया स्वांहः ग्लिसरिन तयाः निनादिसँ । थुगु मिश्रण म्हुतुसिइ बुलादिसँ । थुकिं म्हुतुसियात गुलाबि व नाइसे च्वंगु दयेकाबी ।

# न्ह्यः मवल अथवा तनाव जुयाच्वन धाःसा छ्यंया लिक्क गुलाब तयाः द्यनादिसँ । न्ह्यः मवइगु समस्यां मुक्त जुइ ।

# गुलाबं दयेकातइगु गुलकन्दय् गुलाबया अर्क (अय्लाः काये थें कयातःगु गुलाबया रस) तयातःगु दइ, गुकिं म्हयात सिचुकेत ज्या याइ । थुकिं म्हयात डिहाइड्रेसन जुइगु पाखें रक्षा यानातइ, अले फ्रेस जुइकातइ । प्वाःयात सिचुकातइ । गुलकन्द म्हय् फुर्ति थकयाबीगु सिचुगु टनिक खः, गुकिं त्यानुगु, अल्सि चाइगु, मांसपेशी स्याइगु व हिइसे च्वनीगु समस्या मदयेकाबी ।

# नुगः धुकधुक मिनीगु तच्वयाच्वन धाःसा गंगु गुलाबया स्वांहः दायेकाः त्वनादिसँ ।

# गुलकन्दय् भिटामिन सी, ई व बी प्रशस्त मात्राय् दइ । जा नये धुंकाः गुलकन्द नयेगु यात धाःसा पाचनलिसे स्वापू दुगु समस्या मदयावनी ।

# गुलकन्दय् एन्टिअक्सिडेन्ट यक्व दइ । उकिं म्हय् ल्वय्लिसे ल्वायेगु क्षमता अप्वः दयेकाबी । छ्यंगूया निंतिं नं थ्व तसकं फाइदा दुगु चीज खः । थुकी एन्टिब्याक्टेरियल गुण दु, गुकिं छ्यंगूया समस्या मदयेमाबी ।

# चिचिग्वःगु कै भुल्लल वयाच्वन धाःसा गुलकन्दया सेवन यानादिसँ, कै मदयावनी ।

# मिखाय् गर्मिया कारणं हिइसे च्वनाच्वन धाःसा धू दुहां वनाः समस्या जुल धाःसा गुलाबजलं मिखा सिलादिसँ, याउँसे च्वनावइ । सँकां (द्यः खिउँलकि मिखां मछुइगु ल्वय्) जूपिंत नं गुलाबजल अचूक वासः खः ।

# गुलाबयात निनाः लेप दयेकाः कपालय् इलाबिल धाःसा भचा लिपा हे कपाः स्यानाच्वंगु लनावनी ।

# जा नये धुंकाः ग्वाः नयेगु बानि दुसा ग्वालय् गुलकन्द तयेकाः भपियादिसँ । थुकिं यानाः छिगु सासः नवयाच्वंगु तनावनी, लिसें नयागु नं याउँक पचय् जुइ ।

# फट्किरिइ गुलाबजल तयाः छ्यल धाःसा स्यःकै, चासुकै, दाद इत्यादि नष्ट जुइ ।

# न्हाय्पं स्याइबलय् गुलाबया रस भतिचा न्हाय्पनय् तिकि नंकादिसँ, स्याःगु क्वलाइ ।
गुलाबया अर्कय् कागतिया रस ल्वाकछ्यानाः दाद वःथाय् इलाबिल धाःसा दाद वनी ।

# वाक्वाक् वयाच्वन, कथु हिइसे च्वन, छाति हियसे च्वन आदि जुयाच्वन धाःसा छगू कप गुलाब जल, छगू कपया प्यब्वय् छब्व सन्तरासिया रस व छगू कपया प्यब्वय् छब्व खयःया लः ल्वाकछ्यानाः न्हिं निक्वः त्वनादिसँ ।

# म्ह हिइसे च्वनाच्वन अथवा ल्हाः तुति हिइल धाःसा गुलाबजलय् श्रीखण्ड चुलाः दयेकातःगु लेप तयादिसँ ।

# सासः नवयाच्वंगु दुसा गुलाब स्वां, लवं व चिनि गुलाबजलय् निनाः गुलि चिनादिसँ, अले उगु गुलि म्हुतुइ तयाः चुचुप्याना च्वनादिसँ, सासः नमवयावनी ।

# श्रीखण्डया चिकनय् गुलाबया अर्क ल्वाकछ्यानाः मालिस यात धाःसा शीतपित्तय् फाइदा जुइ ।

# तसकं गर्मि जुल धाःसा अथवा म्ह हिइसे च्वन धाःसा न्यागः सुकुमेल, १० ग्राम गुलाबया स्वांहः, न्यागः मलय् व १० ग्राम मिश्री निनाः प्यघौया छक्वः त्वनाच्वनेगु यानादिसँ, म्ह याउँसे च्वनावइ ।

# तुयूगु श्रीखण्ड पाउडरय् कपू व गुलाबजल ल्वाकछ्यानाः कपालय् इलाबिल धाःसा छ्यं स्याःगु लनावनी ।

# म्हुतुइ दुने ला ब्वला वयाच्वंगु लंकेगु खःसा सुथय् सुथय् गुलकन्द भपादिसँ ।

# लूया असर मलाकेगु खःसा ख्वाउँ लखय् गुलाबजल ल्वाकछ्यानाः कपालय् पट्टि चिनादिसँ ।