२५ प्रतिशतयात छ्यंगूया समस्या

थःगु म्ह बांलाके सुया मयइ ? चट्ट च्वंगु व म्हया बां मिले जूगु खने दयेके सकसितं यइ । सुन्दरता व आकर्षक व्यक्तित्व दुम्ह मनूपाखे न्ह्याम्हेसिया नं ध्यान वनाच्वंगु दु । थुकिया निंतिं झीगु म्हया छ्यंगुलिं तःधंगु भूमिका म्हिताच्वंगु दइ । उकिं छ्यंगूया महत्व नं यक्व दु । सौन्दर्यताया पारखी उकिसनं छ्यंगूया सुसाःकुसाः यायेगुलिइ हे अप्वः ध्यान बियाच्वंगु दइसा अप्वः सतर्क नं जुयाच्वंगु दइ । छ्यंगुलिं हे मनूया व्यक्तित्वयात न्ह्यःने हयेगुलिइ ग्वाहालि नं यानाच्वंगु दइ ।

मूलतः छ्यंगूया रंग गज्याःगु धइगु स्वयां नं गुकथं छ्यंगूया हेरचाह याइगु धइगु खँ अप्वः अर्थ तइगु चिकित्सकतय् धापू दु । नेपालय् खने दइगु न्यागू ल्वय्मध्ये छगू छ्यंगू सम्बन्धी ल्वय् जूगु छ्यंगू ल्वय्या विशेषज्ञ डा. रविन्द्र बास्कोटां धयादी । वय्कलं धयादी, ‘नेपालय् छ्यंगूया ल्वय्या समस्या आपालं दु । कल जनसंख्याया २५ प्रतिशतय् छुं न छुंकथंया व न्यागू प्रतिशतयात कडा छ्यंगूया ल्वय् दु । गुकिया उपचार याकनं यायेमाःगु आवश्यक जू ।’थ्व ल्वय् मौसमकथं नं मनूतय्के खने दया वयेफु ।

हिमाल, पहाड व तराईया फरक फरक भौगोलिक अवस्थाय् च्वना वयाच्वंपिंत जुइगु छ्यंगूया ल्वय् नं फरक फरक हे जुइ । चिकुला व ताल्लाया मौसमय् छ्यंगूया फरक फरक समस्या खने दया वइ । थःगु छ्यंगूया ध्यान बीगु सुन्दरतालिसे जक सम्बन्धित मखसे स्वास्थ्यनाप नं उतिकं स्वानाच्वंगु विषय खः धयादी छ्यंगू ल्वय्या विशेषज्ञ प्रा. डा. सविना भट्टराई ।‘बजारय् दइगु थिकेगु क्रिम जक बुलां बांलाइमखु, उकिया निंतिं सन्तुलित नसा, माक्व लः त्वनेगु व द्यनेगु नापं नियमित रुपं व्यायाम यायेमाःगु नं आवश्यक जू’ वय्कलं धयादी ।लिपांगु इलय् अप्वया वंगु सहरीकरण व उकिं ब्वलनाच्वंगु फोहर, धू, कुँ व प्रदूषणं छ्यंगूयात बांमलाक लिच्वः लाकाच्वंगु दु ।

थुकिं यानाः अनेकथंया चर्मरोग अप्वया वनाच्वंगु चिकित्सकतय् अनुभव दु । चिकित्सकतय्सं छ्यंगुलिइ साधारण जक समस्या खने दुसां नं विशेषज्ञतय्त जांच याकाः उचित व नियमित उपचार विधि नाला कायेमाःगु सुझाव बियादी । सन्तुलित व सही तरिकां छ्यंगूयात सुसाःकुसाः याये फत धाःसा स्वस्थ व सुन्दर खने दयाच्वनीगु डा. भट्टराईया धापू दु । लिपांगु इलय् नेपाःया स्वास्थ्य संस्थाया बहिरंग सेवा उपचारया निंतिं वइपिं मध्ये २० निसें ३० प्रतिशत छ्यंगूया समस्यां पीडितत जुयाच्वंगु दु ।

डा. बस्तोलां धयादी, ‘झीसं छ्यंगूया समस्यायात अपाय्सकं गम्भिर रुपं कायेगु याना मच्वंगुलिं छ्यंगुलिइ थीथीकथंया एलर्जी जुइगु, चातः वइगु, उमेर मगाःनिवं हे अप्वः उमेर दुपिं थें खने दइगु, ला ह्यह्यकुना वनीगु, ख्वाः व सँ सुक्खा जुइगु व छ्यंगुलिइ दयेमाःगु सौन्दर्यता तना वनीगु थेंज्याःगु समस्या जुयाच्वंगु दु । छ्यंगुलिइ जुइगु समस्यायात सामान्य कथं जक कायेगु व इलय् वासः मयात धाःसा उकिं क्यान्सरया रुप काये फइगु खतरा नं उतिकं दु ।‘छ्यंगूया समस्या अप्वया वन वा आपालं ई निभालय् ज्या याइम्हेसित छ्यंगूया क्यान्सर नं खने दयेफु’ डा. बास्तोलां धयादी ।

त्रिवि शिक्षण अस्पताल महाराजगंजय चर्म तथा यौन रोग विभागया पुलांम्ह प्रमुख प्रा. डा. दिनेशविनोद पोखरेलया कथं वातावरणीय प्रदूषण, अस्वस्थकर नसात्वँसा, लाक्वपाक्व वासः नयेगु लगायत थीथी कारणं छ्यंगूया ल्वय् अप्वया वनाच्वंगु दु । वय्कःया कथं चातः वइगु, संक्रमण, स्यःकै, छ्यंगू सुख्खा जुइगु, दुबि वइगु समस्या जुइ । ग्वलाक्क चाकलय् चासुइगु सरुवा ल्वय् दाद खः । थ्व ल्वचं कःम्ह ल्वगिया कापः छ्यलेबलय्, नापं द्यनेबलय् थ्व ल्वचं कयेयः । तर बांलाक वासः यायेगु खःसा थ्व ल्वय् लनी । अथे हे एग्जीमा धइगु नं छ्यंगुलिइ जुइगु एलर्जी खःसां थ्व मेपिंत पुनी मखु । तसकं चासुगु थ्व नं उपचार यात धाःसा लनी ।

चसुकै नं छ्यंगुलिइ हे जुइगु मेगु ल्वय् खःसा थ्व ल्वचं कःम्ह नापं च्वनेत तकं मछिंगु अवस्था वइगु जक मखसे मेपिंत नं पुनेयःगु ल्वय् खः । थ्व ल्वचं मनूया व्यक्तित्वयात हे खराब यानाबी । अथे हे ल्याय्म्हया इलय् खने दइगु स्यःकै । ख्वालय् जक मखसे म्हय् नं वइगु थुकियात नं वासः यायेगु खःसा इलय् समस्यां मुक्त जुइ फइ । गुलिसितं हार्मोनया खराबीं थ्व ल्वचं कइगु व बजारय् दइगु लाक्वपाक्व क्रिम बुलेबलय् नं स्यःकैया समस्या वयेयः । थ्व बाहेकं थीथी किटाणु, ब्याक्टेरियाया संक्रमणं नं छ्यंगूया समस्या जुइयः घाः जुइगु, घाः पाके जुइगु, मना वइगु, स्याइगु, चासुया वइगु थेंज्याःगु छ्यंगुलिइ जुइगु संक्रमण खः ।

ख्यें, न्याः, ख्वाउँ, धू, अत्तर, ला, दुरु आदिया एलर्जी नं समस्या जुइयः । नेपालय् गुलि मनूयात छ्यंगूया समस्या दु धइगु बारे छुं यकिन तथ्यांक मदु । थःत बांलाः खने दयेकेत बजारय् वासः न्यानाः नयेगु,, न्ह्यःने लाः क्रिम बुलेगु वा लोसनया प्रयोगं छ्यंगूया समस्या जुइफुगुलिं अज्याःगु बानी मयायेत चिकित्सकतय् सुझाव दु । छ्यंगूयात ध्यान बीगु नापं ल्वयेक जक निभालय् जुइत, सन ब्लक, सनस्किन क्रिमया प्रयोग यायेगु नापं आपालं मात्राय् लः त्वनेगु चिकित्सकतय् सुझाव दु ।

सम्बन्धित बुखँ

LEAVE YOUR COMMENTS