न्हूम्ह कुमारी आर्यतारा शाक्य
येँ (नेपालभाषा टाइम्स)- येँया न्हूम्ह लाय्कू कुमारी कथं मय्जु आर्यतारा शाक्ययात ल्यःगु दु । कुमारी ल्ययेगु परम्परागत पद्धति कथं वय्कःयात न्हूम्ह कुमारी कथं ल्ययेगु ज्या जूगु खः । वय्कः येँया इतुम्बहाः अर्थात भाष्करदेव संस्कारित केशचन्द्रकृत पारावर्त महाविहारया शाक्य कुलपुत्री खः । वय्कःया उमेर थौंकन्हय् निदँत्या स्वयां भचा अप्वः थ्यनाच्वंगु दु ।
वय्कः उगु विहारया भाजु अनन्त शाक्य व मय्जु प्रतिष्ठा शाक्यया म्ह्याय्मय्जु खः । वय्कःया बाज्या अमृतरत्न शाक्य खःसा अजि शिलु शाक्य खः । वय्कःया बाज्या अमृतरत्न शाक्य नेपालभाषाया नांजाःम्ह म्ये च्वमि खः ।
आः थ्वहे वइगु अष्टमि मंगलवाः कुन्हु न्हिनसिया १२ः०५ निसें १२ः१६ बजे तकया साइत दुने वय्कःयात कुमारी छेँय् छगू विशेष अनुष्ठान यासें न्हूम्ह कुमारीया आसनय् बिराजमान याकीगु ग्वसाः दु । नवमि कुन्हु हनुमानध्वाखाया तलेजुइ यंकाः विशेष पुजा जुइ । दशमि कुन्हु वसपोलं मोहनिया सिन्हः तिकाबिज्याइ ।
थुगुसी न्हूम्ह कुमारी ल्ययेगु ज्याया भाला शाक्य महाविहार संघपाखें याःगु खः । न्हूम्ह कुमारी ल्ययेया लागिं संघं कुमारी जुइ जुइपिं येँया झिंखुगू बहालय् पौ छ्वयाः नां मुंकेगु ज्या याःगु खः ।
संघया महासचिव संघरत्न शाक्यं ‘नेपालभाषा टाइम्स’ यात कनादीकथं कुमारी जुइगु लागिं आपालं निवेदन वःगु खःसां संघं दयेकातःगु मापदण्ड दुने लाःपिं स्वम्हेसित जक अन्तिम छनौटय् दुथ्याकूगु खः । थ्व स्वम्ह मध्ये आर्यतारायात न्हूम्ह कुमारी ल्ययेगु ज्या जूगु खः । थुकी गुथि संस्थान, पञ्चाङ निर्णायक समितिं नं भूमिका म्हितूगु खःसा आः छनौट जूम्ह शाक्यपुत्रीयात राष्ट्रप्रमुखयाथाय् नं यंकाः नापलाकीगु ग्वसाः दु ।
अष्टमि कुन्हु न्हूम्ह कुमारीयात आसनय् तयेगु ज्याया नापनापं निवृत्त जुइम्ह कुमारी माजुयात आसनं क्वकयाः बाजागाजा सहित छेँय् तः वनेगु ज्या नं जुइ । थौंकन्हय् मय्जु तृष्णा शाक्य कुमारीया आसनय् दी । वसपोलया छेँ ओमबहालय् खःसां कुमारी छेँनं विदाइ यानाः नःघःया पाजुपिनि छेँय् यंकेगु तयारी जुयाच्वंगु खँ धाःगु दु । निवृत्त जुइम्ह कुमारीयात कुमारी छेँया दबूपाखे स्वःगु चिद्वाःगु लुखां पित यंकीगु चलन दु । वसपोल वंगु च्यादँ न्ह्यः कुमारीया आसनय् विराजमान जुयाबिज्याःगु खः ।
LEAVE YOUR COMMENTS