कागति लः त्वनेगुया फाइदा

# सुथय् खालि प्वाथय् कागति लः त्वनेगुलिं यक्व फाइदा याः । कागतिपाखें दइगु भिटामिन एं मिखाया ल्वय् लंकाबी । भिटामिन बीं पाचनशक्ति बल्लाकी, अले भिटामिन सीं रक्तविकार मजुइकाबी ।

# दायेकागु लः छगू गिलास जायेकाः उकी कागति निगः तिसिनाः कागति लः दयेकादिसँ, अले ख्वाउँलकि त्वनादिसँ । सुथन्हापां न्हिं न्हिं थथे यानाः लछि तक त्वनाच्वन धाःसा हि सफा जुइ । थुकिं यानाः म्हया अंग अंग पतिकं फुर्ति थहां वइ । मिखा त्यय्लाना वइ । मानसिक दुर्बलता न्हनावनी, कपाः स्याइगु मजुयावनी ।

यक्व ज्या याःसां नं त्यानुइ मखु । थुकियात चिनि व चि ल्वाकमछ्यासे हे छघुतु छघुतु यानाः त्वनेगु यायेमाः । मालावन धाःसा कस्ति निगू चम्चा ल्वाकछ्याःसां जिउ । चिनि व चि आपाः नयेगु उसाँय्यात मनिं । असाध्य ल्वचय् तःन्हु तक मनसे च्वने धुंकाः जा नकी मखु । तर कागति लः भचा भचा यानाः त्वनाच्वन धाःसा ल्वगिया म्हं दूषित पदार्थ पिहां वनाः ल्वय् लनावनी ।

# थीथी ल्वचं मकयेका च्वनेत, स्वास्थ्य व शक्ति प्राप्त यायेत कागतिया रस व कागति लः भिटामिन सीया भण्डार खः । म्हय् भिटामिन सी मगातकि एनीमिया, साहा साहा स्याइगु, वाया ल्वय् पायरिया, मुसु दम आदि ल्वय् जुइफु । कागति लः त्वनेगु यानाच्वनकि थज्याःगु ल्वचं काचाक थी फइमखु ।

# सन्तरासि कुलयागु दक्वं फल गथेकि कागति, सन्तरासि व मुसुमय् भिटामिन सी यक्व हे दइ । थुलि बाहेक भिटामिन सीया छगू मेगु स्रोत अम्बः नं खः । तर अम्बःया भिटामिन सीं मेमेगु गुलिखे यौगिकलिसे ल्वाकज्यानाः छताजि तेज रसायन दयेकी, गुकिया कारणं अम्बलय् दुगु भिटामिन सीया लाभ म्हयात थुकिया सेवन ताःई तक यायेधुंकाः हे जक चूलाइ ।

थुकिया थ्याक्क अःखः सन्तरासि कुलया दक्वं सिसाबुसाय् दइगु भिटामिन तसकं अःपुक पचय् जुइ, अले याकनं फाइदा याइ । कागतिया विशेष महत्व थुकी दइगु भिटामिन सी अर्थात एस्कर्बिक एसिडया कारणं खः ।

कागति लखं शक्तिवर्धक ड्रिंक्स दयेकेगु प्यंगू विधि

# ४० ग्राम किसमिस, खुगः मस्र्याबरां, खुगः पिस्ता बहनी बागू लिटर लः छगः खाःयागु थलय् तयाः फ्वयादिसँ । सुथय् छानय् यानाः नचुक निनाः हानं थुकी हे ल्वाकछ्यानाः छगू चम्चा कस्ति व छगः कागति तिसिनाः खालि प्वाथय् त्वनादिसँ । थुगु कागति लः टनिकं मानसिक व शारीरिक कमजोरी, त्यानुगु दक्वं मजुयावनी ।

# छगू कप क्वाःलः, सिंचि छप्तिचा, बेय्चि छप्तिचा, छगू चम्चा चिनि, झिफुति कागतिया रस, सियाः नीनातःगु जी छगू चम्चाया प्यब्वय् छब्व, दक्वं ल्वाकछ्यानाः त्वनादिसँ । थ्व तसकं साइ, अले थुकिं पाचनशक्ति व शारीरिक शक्ति थकाइ । थुकियात च्याया पलेसा त्वनेगु याःसा बांलाइ । थुपिं ल्वाकछ्यायेगु चीजत सवाः कथं व परहेज कथं अप्वः म्हो यायेजिउ । थ्व म्हं मफइबलय् नं त्वनेजिउ । न्हिं स्वक्वः तक त्वनाबिल धाःसा यक्व फाइदा जुइ ।

# स्वंगः छोहरा पु लिकयाः कुचा थलादिसँ । छगू गिलास लखय् थ्व छोहरा, झिंन्यागः किसिमिस, छगः कागतिया रस तयाः बहनी खुल्ला पल्लिइ तयादिसँ, सुथय् थ्व कागति लः त्वनादिसँ । छोहरा व किसमिस भपादिसँ । लगातार प्यला तक सेवन यानादिसँ । ख्वालय् न्याक्क हे चमक दयावइ ।

# छगू किलो चिनि, ३५० मिलीलिटर लः, निगः कागतिया रस– थ्व स्वतां चीज ल्वाकछ्यानाः, दायेकाः कापः छकुतिइ छानय् यानादिसँ । ख्वाउँलकि खाःया थल छगलय् जायेकाः तयादिसँ । थ्व चास्नी दछि तक स्यनीमखु । थुकियात सर्बत दयेकाः त्वनेगु यानादिसँ ।