सिरिन्ज आक्रमणय् हानं मेम्ह ज्वन

भ्वँत – भ्वँतय् सिरिन्ज आक्रमणयात कयाः तनाव ब्वलंगु दु । स्थानीय वासिन्दां अन प्रहरी चौकी घेरे यानाः दोषीयात कारबाही यायेमाःगु माग याःगु दु । म्हिगः सुथय् लँय् न्यासि वनाच्वंम्ह व बसय् च्वना वनाच्वंपिं मिसातय्सं थःपिंत सिरिन्ज आक्रमण जूगु खँ धाःगु खः ।
भ्वँतय् सिरिन्ज आक्रमण यानाः मनूत घाःपाः जूसां प्रहरीं धाःसा सुयातं नं ज्वने मफुगु खँय् स्थानीय जनता तम्वःगु खः ।

थ्व झ्वलय् स्थानीय वासिन्दां छम्ह मनूयात ज्वनाः प्रहरीयात जिम्मा बिउगु दु । स्थानीय वासिन्दां सिरिन्ज आक्रमण याःम्ह धकाः खगेन्द्रप्रसाद पाठकयात ज्वनाः प्रहरीयात लःल्हाःगु खः । आः पाठकयात हिरासतय् तयाः अनुसन्धान जुयाच्वंगु दु । पाठकं थम्हं सिरिन्ज आक्रमण मयानागु खँ धाःगु दु ।

सिरिन्ज आक्रमणं पीडित जूपिं मिसातय्त थनया शिर मेमोरियल अस्पतालय् वासः याकातःगु दु । थ्व स्वयां न्ह्यः येँय् सिरिन्ज आक्रमण याःम्ह छम्ह मनूयात प्रहरीं ज्वंगु दु । वयात कयाः प्रहरीं छानबिन यानाच्वंगु दु । उम्ह मनुखं आक्रमण थम्हं यानागु खँ स्वीकार यासें मनोरञ्जनया लागिं आक्रमण यानागु खः धाःगु दु ।