नगरप्रहरीयात ट्राफिक व्यवस्थापन तालिम

यल (नेपालभाषा टाइम्स) – स्वनिगलय् अप्वया वनाच्वंगु सवारी साधन व उकिं यानाः ब्वलनाच्वंगु ट्राफिक व्यवस्थापनय् आः महानगर प्रहरी नं कुहां वःगु दु । उकिया निंतिं यल महानगरपालिकां थः माहतहतया नगर प्रहरीयात ट्राफिक व्यवस्थापनया तालिम बीगु शुरु याःगु दु । यल मनपां नगरया ट्राफिक व्यवस्थापन यायेगु व सवारी व्यवस्थापनय् ट्राफिक प्रहरीयात ग्वाहालि यायेगु ल्याखं थःपिनि नगरप्रहरीयात ट्राफिक व्यवस्थापनबारे तालिम बिउगु खः ।

यल मनपाया प्रमुख चिरिबाबु महर्जनं यल महानगर दुने अप्वया वनाच्वंगु सवारी चाप व दुर्घटनायात म्हो यानाः देय्या हे नमूना नगर दयेकेगु ल्याखं नगर प्रहरीयात ट्राफिक व्यवस्थापनया तालिम बियागु जानकारी बियादिल । लिपांगु इलय् सरकारं सवारी साधनय् तयातःगु जोर बिजोर प्रणाली चिइकेधुंकाः स्वनिगःया सतकय् सवारीया चाप अप्वःगु नापं दुर्घटना नं अप्वःगु धासें थुकिया न्यूनीकरण यायेत व सवारी व्यवस्थापनय्ट्रा फिक प्रहरीयात ग्वाहालि यायेगु ल्याखं तालिमया शुरुवात यानागु यल नगर प्रहरी प्रमुख सिताराम हाछेथुं कनादिल ।

महानगरीय ट्राफिक प्रहरी महाशाखाया समन्वयय् निम्ह ट्राफिक प्रहरीं बियाच्वंगु तालिम बाःछितक न्ह्याइ ।