लगंख्यलय् वाति लः मुंकेगु तुंथि लःल्हात

येँ – वाटरएड नेपाल व कोकाकोला फाउन्डेसनया ग्वाहालिं एकीकृत शहरी विकास केन्द्रं वाति लः मुंकाः भूमिगत रुपं लः मुंकेगु परियोजना नेपाली सेनाया श्री राजदल गणयात लःल्हाःगु दु । सन् २०२० या जनवरीइ सुरु याःगु थ्व परियोजना यल महानगरपालिकाया मेयर चिरिबाबु महर्जनया उपस्थितिइ यलय्च्वंगु राजदल गणयात हस्तान्तरण याःगु खः ।

थ्व परियोजना दयेकूगु लगंख्यः लागा प्राकृतिक रुपं पुनभरण क्षेत्र खः, थनं यलय् हाइगु थीथी गाःहितिइ लः आपूर्ति जुयाच्वंगु दु ।
थ्व परियोजना कथं व्यारेक दुने ५१ गू फिल्टर च्याम्बर सहित ५१ गू तुं दयेकूगु खः । थ्व तुंथिइ दँय् ५ करोड १० लाख लिटर लः मुनीगु अनुमान यानातःगु दु । थुकिया लिसें सतहं वइगु लखय् दइगु ‘थिगर’ व फि चिइकेत व थ्व क्षेय् फोहर लः वयेफइगु स्वंगू थासय् थिगर चिइकीगु बेसिन नं तःगु दु । अथेहे भूमिगत लः पुनभरण सम्बन्धी ज्याया प्रदर्शनया निंतिं थन छगू ‘वर्षा क्यब’ नं दयेकूगु दु ।