तरकारीया विषादी परीक्षणय् मन्त्रीया दावी –‘सचिवतय्सं डुबे याना बिल’

येँ – उद्योग, वाणिज्य तथा आपूर्तिमन्त्री मात्रिका यादवं नेपालय् दुहां वइगु तरकारी व फलफूलय् विषादी परीक्षण यायेगु निर्णयपाखें लिचिलेगुमाःगु अवस्थाया लिउने सचिवतय्गु ल्हाः दु धकाः द्वपं बियादीगु दु । म्हिगः मन्त्रालयं ग्वसाः ग्वःगु पत्रकार सम्मेलनय् न्ववासें मन्त्री यादवं सचिवतय्त विश्वास यानागुलिं थः डुबे जूगु खः धकाः नं कनादिल ।

वय्कलं धयादिल, ‘प्रधानमन्त्री कार्यालय, कृषि व थःगु हे मन्त्रालयया प्यम्ह सचिवं जितः डुबे यानाबिल । निर्णय यायेगु इलय् जितः गुमराहलय् तल ।’प्रधानमन्त्री वा मेपिं सुयागुं दबाबं वा भारतया पौ वयाः थम्हं निर्णय लित कयागु मखु धासें वय्कलं सचिवया भर कयागुलिं थः डुबे जूगु खँ कनादिल ।

निर्णय यायेगु इलय् सचिवतय्सं विषादी परीक्षण बारे नेपाःया क्षमता गुलि दु धकाः थःत मकंगु धासें मन्त्री यादवं धयादिल, ‘सचिवं ला मसिल मसिल, प्रधानमन्त्री कार्यालयया सचिवं ला थ्व खँ सीमाःगु खः ।’मन्त्री यादवं पूर्वाधार मदयेकं निर्णय यायेगु थःगु गल्ति जूगु धासें फुक्कं जिम्मेवारी थम्हं कायेगु खँ नं अन कनादिल ।

वय्कलं धयादिल, ‘सचिवतय्सं जितः धा हे मधाः, पूर्वाधार मदयेक निर्णय यायेगु जिगु गल्ती खः । फुक्कं जिम्मा जिं काये, पूर्वाधार दयेकेधुंकाः विषादी परीक्षण हानं न्ह्याइ ।’सरकारं असारंनिसें लागू जुइ कथं नेपालय् दुहां वइगु तरकारी व फलफूलय् विषादी परीक्षण यानाः विषादी मदुगु पुष्टि जुइधुंकाः जक दुकाये दइगु निर्णय याःगु खः ।

तर लिपा उगु निर्णय लित कायेवं सर्वसाधारण जनता जक मखु सत्तारुढ नेपाल कम्युनिष्ट पार्टी दुने तकं उकिया कडा प्रतिरोध जूगु खः ।
नागरिकयात विषादी दुगु तरकारी व फुलफूल मनकेगु बांलाःगु भावनां ज्या न्ह्याकूगु खःसां थुकिं तःधंगु भुखाय् ब्वःगु धासें अझ नं पराकम्प यायेगु ज्या जुयाच्वंगु खँ वय्कलं कनादिल ।

थ्वहे झ्वलय् राष्ट्रिय मानव अधिकार आयोगं विषादी परीक्षण दिकेगु सरकारी निर्णय प्रति गम्भीर आपत्ति प्वंकूगु दु । आयोगं उपभोग्य वस्तुइ विषादीया मात्रा व अवस्थाया जाँच मयासे आयात यानाच्वंगु धासें थुकिं आम उपभोक्ता, विषादी छ्यलीपिं किसान व ज्यामितय् स्वास्थ्यय् गम्भीर लिच्वः लाइगु खँ धाःगु दु ।

म्हिगः छगू प्रेस विज्ञप्ति जारी यासें आयोगं नेपाःया संविधान, कानून व मानवअधिकार सम्बन्धी अन्तर्राष्ट्रिय कानूनया दायित्वयात लुमंकुसें विषादीया कारणं ब्वलनीगु मानवीय व वातावरणय क्षति पनेमाःगु दायित्व सरकारया जूगुलिं आयातित व देय् दुने हे उत्पादन जुइगु तरकारी लगायत खाद्य वस्तुइ लाथेपाथे छ्यलाच्वंगु विषादीयात निरुत्साहित यायेत नं माग याःगु दु ।

सम्बन्धित बुखँ

LEAVE YOUR COMMENTS